Astyq bazalary 2024 jyly ónim qabyldaý kólemin eki esege arttyrdy
ASTANA. KAZINFORM — Azyq-túlik kelisim shart korporatsııasynyń astyq bazalary 2024 jyly astyqty qabyldaý jáne jóneltý kólemin ulǵaıtty, dep habarlaıdy AShM baspasóz qyzmeti.
Azyq-túlik kelisimshart korporatsııasynyń «Astyq qoımalary» JShS enshiles kásipornynyń astyq bazalary 2024 jyly astyq qabyldaý kólemin eki esege arttyrdy.
2024 jylǵy qańtardan jeltoqsanǵa deıin aýyl sharýashylyǵy óndirýshileri tórt astyq qabyldaý pýnktiniń elevatorlaryna 411,7 myń tonna astyq tapsyrdy, bul ótken jyldan 185,7 myń tonnaǵa artyq. 2024 jylǵy egindi jetkizýde 3-synypty bıdaı basym boldy.
Jyl ishinde kásiporynnyń astyq qoımalarynan 346,4 myń tonna astyq pen maıly daqyldar jóneltilip, tasymaldandy. 2023 jyldyń sáıkes kezeńimen salystyrǵanda «Astyq qoımalary» astyq bazalarynda jóneltý kólemi 17,9%-ǵa (nemese 62 myń tonna) ósti.
— Kásiporynnyń astyq qabyldaý pýnktteri Aqmola, Soltústik Qazaqstan jáne Qostanaı oblystarynda ornalasqan. 2025 jylǵy 20 qańtardaǵy jaǵdaı boıynsha tórt nan bazasynda 288,6 myń tonna astyq saqtalýda, — delingen habarlamada.
«Astyq qoımalary» JShS mamandary AQP-de ornalasqan aýyl sharýashylyǵy ónimderiniń sapa parametrleriniń saqtalýyna turaqty baqylaý júrgizedi. Astyqty saqtaý sharalaryn kúsheıtý úshin astyq bazalary IP-beınebaqylaý júıelerimen jabdyqtalǵan, kásiporynda óndiristik protsesterdi beınetirkeý júrgiziledi.
Osyǵan deıin Qazaqstan jańa naryqtarǵa 1,5 mln tonnaǵa deıin astyq eksporttaýdy kózdeıtinin jazǵan edik.