ASTEX 2013 halyqaralyq kórme-konferentsııasynda otandyq jáne sheteldik kompanııalar ózderiniń noý-haýlaryn kópshilikke usyndy
ASTANA. 21 mamyr. QazAqparat - QR birinshi vıtse-premeri, Óńirlik damý mınıstri Baqytjan Saǵyntaev jáne QR Kólik jáne kommýnıkatsııa mınıstri Asqar Jumaǵalıev ASTEX 2013 halyqaralyq kórme-konferentsııasynyń jumysymen tanysty, dep habarlady QR KKM baspasóz qyzmetinen.
Halyqaralyq kórme aıasynda otandyq jáne sheteldik kompanııalarmen qatar otandyq ǵalymdar men Halyqaralyq IT ýnıversıtetiniń stýdentteri de ózderiniń noý-haýlaryn kópshilikke usyndy. Atap aıtsaq, kórme qonaqtarynyń nazaryna birden birneshe otandyq robot usynyldy.
Budan basqa, ulttyq startap jobalary baıqaýynyń jeńimpazdary da óz jobalaryn tanystyrdy. Olardyń qatarynda Web RTC tehnologııasy negizinde jumys isteıtin IP telefonııa servısi men Shoppy.kz portalyn aıtýǵa bolady.
ASTEX 2013 halyqaralyq kórme aıasynda QR Premer-mınıstriniń birinshi orynbasary Baqytjan Saǵyntaevtyń jáne Kólik jáne kommýnıkatsııa vıtse-mınıstri Sáken Sársenovtiń, sondaı-aq álemdik AKT naryǵynyń kóshbasshy kompanııalary ókilderiniń qatysýymen konferentsııa bolyp ótti. Onda túrli baǵyttaǵy mysaly, elektrondyq úkimet, densaýlyq saqtaý, bilim berý, bıznes salalaryndaǵy ınnovatsııalyq jańashyldyqtar talqyǵa tústi.
Konferentsııaǵa qatysýshylar qatarynda bıznes-trenerler men ǵalymdar, sheteldik kompanııa basshylary da boldy. Atap aıtsaq, olar - Braıan Kameron - AQSh úkimetiniń keńesshisi, Fılıpp de Marselıak - IDC vıtse-prezıdenti, doktor Ang Mon Sýg - Ońtústik Koreıa Prezıdenti janyndaǵy elektrondyq úkimet boıynsha arnaıy komıtettiń tóraǵasy.
