Astaufest baıqaýynyń bas júlde ıegerleri anyqtaldy
ASTANA. KAZINFORM — Astanada VII ASTAUFEST halyqaralyq gastronomııalyq festıvali ótti.
Elordada VII ASTAUFEST halyqaralyq gastronomııalyq festıvali ótip, oǵan Qazaqstannyń óńirleri men shetelden 30-dan astam bilim berý uıymynyń 200-den astam ókili qatysty.
Úsh kúnge sozylǵan festıvaldi Astanadaǵy Qoǵamdyq tamaqtandyrý jáne servıs kolledji uıymdastyrdy. Halyqaralyq baıqaý stýdentter men jas mamandardyń kásibı sheberligin shyńdaýǵa, tájirıbe almasýǵa jáne qoǵamdyq tamaqtandyrý salasyndaǵy kásibı daǵdylaryn damytýǵa baǵyttaldy.
Bıyl festıvalde ulttyq taǵamdarǵa erekshe nazar aýdaryldy. Qatysýshylar qazaqtyń dástúrli aspazdyq murasyn zamanaýı gastronomııamen ushtastyryp, ulttyq taǵamdardy jańa qyrynan tanystyrdy.
Baıqaýǵa Qytaı, Frantsııa, Túrkııa, Kıpr, Shveıtsarııa, Ózbekstan, Qyrǵyzstan jáne Reseıden kelgen 13 halyqaralyq sarapshy qazylyq etti.
Baıqaý qorytyndysy boıynsha Gran-prı ıegerleri anyqtaldy:
«Jyldyń úzdik aspazy – 2026» nomınatsııasynda stýdentter arasynda Petropavl qalasyndaǵy Joǵary qurylys-ekonomıkalyq kolledjiniń stýdenti Vladıslav Tokarev jeńimpaz atandy. Komandalyq esepte Tatarstan ókilderi Artem Zahvatov pen Nıkıta Danılov úzdik dep tanyldy. Al sheberler arasynda Ózbekstannan kelgen Nazıra Alımatova Gran-prı ıelendi.
«Jyldyń úzdik naýbaıshysy – 2026» nomınatsııasynda Almaty memlekettik bıznes kolledjiniń ókili Karına Kamalova Gran-prı jeńip aldy.
«Jyldyń úzdik kondıteri – 2026» nomınatsııasynda Qyrǵyzstan ókili Aıelına Alıkýl bas júldege ıe boldy.
Halyqaralyq festıval tehnıkalyq jáne kásiptik bilim berý uıymdary stýdentteriniń kásibı sheberligin arttyrýǵa, tájirıbe almasýǵa jáne halyqaralyq deńgeıde óz qabiletterin kórsetýge múmkindik berdi.
