Astrahanda kópqabatty úıdiń bir bóligi opyrylyp qulady
Reseıdiń Astrahan qalasynda kópqabatty úıdiń bir bóligi opyrylyp qulady. Bul týraly Astrahan oblysynyń gýbernatory Igor Babýshkın Telegram-daǵy jeke kanalynda jazdy. Kazinform bul týraly TASS-qa silteme jasap habarlaıdy.
«Astrahanda Vokzal mańy alańyndaǵy úıdiń bir bóligi qulady. Shuǵyl qyzmetter oqıǵa ornynda. Meniń tapsyrmammen jedel shtab quryldy», - dep jazdy ol.
TASS-qa shuǵyl qyzmetterden málim etkendeı, bes qabatty úıdiń eki kireberis bóligi opyrylǵan.
I.Babýshkınniń aıtýynsha, turǵyndar úshin Astrahandaǵy mektepte ýaqytsha ornalasý pýnkti uıymdastyryldy. Qalanyń eki aýrýhanasy zardap shekkenderdi qabyldaýǵa daıyn otyr. Oqıǵa ornynda medıtsına mamandary jumys isteýde.
«213 adam evakýatsııalandy, onyń ishinde 37 bala bar. Zardap shekkender boıynsha málimet naqtylanyp jatyr», - delingen Reseı Tótenshe jaǵdaılar mınıstrliginiń baspasóz baıanynda.
Sondaı-aq vedomstvo deregine súıensek, oqıǵa bolardyń aldynda úıdiń qabyrǵalarynda jaryqtar baıqalǵany týraly aqparat túsken.
Úıdiń qulaýyna gaz jarylysy sebep boldy degen nusqa joqqa shyǵaryldy.
Úıindilerdiń astyn tekserip jatqan qutqarýshylar bir mınýt tynyshtyq jarııalady. Bul qırandy astynda qalýy múmkin adamdardyń daýysyn estý úshin jasaldy.
