Astana–Temirtaý jolynyń 16 shaqyrymy jańartyldy: 9 kirme jol jasaldy
ASTANA. KAZINFORM — «QazAvtoJol» UK» AQ Aqmola oblysynyń Tselınograd aýdanyndaǵy respýblıkalyq mańyzy bar KAZ05 «Astana – Qabanbaı batyr – Temirtaý» avtojolynyń 16 shaqyrymynda ortasha jóndeýdi aıaqtady. Bul týraly ulttyq kompanııanyń baspasóz qyzmeti málim etti.
Jol jamylǵysy tolyq jańartylyp, qozǵalys qaýipsizdigin arttyrý maqsatynda jaryqtandyrý júıesi men baǵdarshamdar ornatyldy, kirme jáne shyǵý joldary men jol ınfraqurylymynyń basqa da elementteri retke keltirildi.
Jóndeý 35–51 shaqyrym aralyǵynda júrgizildi. III tehnıkalyq sanattaǵy bul avtojol Astanany Tselınograd aýdanynyń eldi mekenderimen baılanystyryp, ári qaraı Temirtaý baǵytyna shyǵatyn mańyzdy kólik arterııalarynyń biri sanalady.
— Joba aıasynda 16 shaqyrym boıyndaǵy jol tóseminiń qurylymy tolyq jańartyldy. Deformatsııaǵa beıim tustarda aıazdan isingen qabattar alynyp, jol negiziniń tegisteý qabaty jasaldy. Onyń ústine qalyńdyǵy 6 santımetr iri túıirshikti asfaltbeton qospasynyń tómengi qabaty jáne 5 santımetr qıyrshyqtas-mastıkalyq asfaltbetonnyń ústińgi qabaty tóseldi, — delingen habarlamada.
Qıyrshyqtas-mastıkalyq asfaltbeton jol jamylǵysynyń kólik salmaǵyna tózimdiligin arttyryp, joltabannyń paıda bolý qaýpin tómendetedi jáne aýa raıynyń áserine beriktigin kúsheıtedi.
Qozǵalys qaýipsizdigine de basymdyq berildi. Jańa jol tańbalary syzylyp, jol jıekteri jonylǵan materıalmen nyǵaıtyldy. Jalpy aýmaǵy 1 420 sharshy metr bolatyn 9 kirme jáne shyǵý joly jasalyp, 1 852 boılyq metr qısyq jıektas ornatyldy.
Sonymen qatar demalys alańy jóndelip, jańa avtopavılon qoıyldy.
Eldi mekenderge kireberister men kólik qozǵalysy qarqyndy bólikterdegi ınjenerlik ınfraqurylym da jańǵyrtyldy. 26+650–29+650 shaqyrym aralyǵyna syrtqy jaryqtandyrý júıesi tartyldy. 28+300 jáne 33 shaqyrymda baǵdarshamdar ornatyldy. Bul sharalar qarańǵy ýaqytta joldyń kórinýin jaqsartyp, kólik aǵynyn retteýge jáne jol qıylystaryndaǵy qaýipsizdikti arttyrýǵa múmkindik beredi.
Ortasha jóndeýge 46 arnaıy jol tehnıkasy men eki asfaltbeton zaýyty jumyldyryldy. Nysanda ınjenerlik-tehnıkalyq mamandar, mehanızatorlar men jol jumysshylaryn qosa alǵanda 69 adam eńbek etti.
Jóndeý nátıjesinde 16 shaqyrym jolǵa jańa ári tegis jabyn tóselip, kólik qozǵalysyna qolaıly jaǵdaı jasaldy. Sonymen birge júrgizýshiler men mańaıdaǵy eldi meken turǵyndarynyń qaýipsizdigi úshin qajetti ınfraqurylym kúsheıtildi.
«QazAvtoJol» UK» AQ Aqmola oblysyndaǵy respýblıkalyq joldardy kezeń-kezeńimen jańartýdy jalǵastyrýda. Bul rette jol jamylǵysynyń sapasyna, qozǵalys qaýipsizdigine jáne jol ınfraqurylymyn jetildirýge basymdyq beriledi.
Aıta keteıik, buǵan deıin Rahman qaınaryna aparatyn jol eki saǵatqa qysqarǵanyn jazdyq.
