«Astana—Sankt-Peterbýrg» áýe reısinde bomba bar» — Jalǵan habar bergen azamatqa sot úkimi shyqty
ASTANA. KAZINFORM — Terrorızm aktisi týraly jalǵan habarlama bergen shetel azamatyna 2,5 mln teńge aıyppul salyndy, — dep habarlaıdy Polisia.kz.
2023 jyldyń kúzinde kóliktegi polıtsııa departamenti qyzmetkerleri 36 jastaǵy sheteldik azamatty «Astana — Sankt-Peterbýrg» baǵytyndaǵy áýe reısinde terrorızm aktisi bolatyny jaaıly jalǵan habar bergeni úshin ustaǵan bolatyn. Joǵaryda atalǵan derek boıynsha sotqa deıingi tergeý júrgizildi.
Tergeý barysynda quqyq buzýshy óz kinásin tolyq moıyndap, jasaǵan isine ókingen. Ol otbasylyq janjaldan keıin jubaıy Sankt-Peterbýrgke ushyp ketpekshi bolǵandyqtan, osyndaı qadamǵa barǵanyn túsindirdi.
— Qańtar aıynyń sońynda Astana qalasynyń qylmystyq ister jónindegi aýdanaralyq sotynyń sheshimimen atalǵan azamat kináli dep tanylyp, oǵan 750 AEK, ıaǵnı 2 587 700 teńge mólsherinde aıyppul túrinde jaza taǵaıyndaldy, — dedi departament bastyǵy Baqytjan Malybaev.
Malybaevtyń aıtýynsha, mundaı qadam jasaýdyń sebepteri ártúrli, naqtyraq aıtqanda abaısyz jeńil-jelpi sóılegennen bastap, qasaqana buzaqylyqqa deıin. Kóbinese, mundaı qylmystardy azamattar masań kúıde jasaıdy.
— Ókinishke oraı, azamattar áli kúnge deıin osyndaı teris qylyqtar úshin jaýapkershiliktiń aýyr ekenin bile bermeıdi. Kólik ınfraqurylymy obektileri bir ýaqytta óte kóp adam shoǵyrlanatyn nysan bolyp tabylady. Sondyqtan mundaı qaýipti sózderden keıin birden quqyq qorǵaý organdarynyń qyzmetkerleri obektini qorshaýǵa alyp, adamdardy evakýatsııalap, shuǵyl qyzmetter iske qosylady, reıster toqtatylady nemese keshiktiriledi, — dep túıindedi sózin vedomstvo basshysy.
Sondaı-aq, ol terrorızm aktisi týraly kórineý jalǵan habar bes myń aılyq eseptik kórsetkishke deıingi mólsherde aıyppul túrinde ne sol mólsherde túzeý jumystarymen ne bes jylǵa deıingi merzimge bas bostandyǵyn shekteýmen ne sol merzimge bas bostandyǵynan aıyrýmen qylmystyq jaýaptylyqty kózdeıtinin eske saldy.
Sonymen qatar, jalǵan terrorıster sot sheshimi boıynsha oqıǵa ornyna jumyldyrylǵan jedel áreket etý qyzmetteriniń barlyq shyǵyndaryn tolyq kólemde óteıdi.
