«AstanaPianoPassion» baıqaýyna ótinim qabyldaý bastaldy
ASTANA. 19 jeltoqsan. QazAqparat - «AstanaPianoPassion» baıqaýynyń arnaıy saıtynda ótinim qabyldaý bastaldy. Keshe Ekinshi Halyqaralyq jas pıanıster baıqaýyna balalardyń qatysý sharttary tolyqtaı sıpattalǵan Erejeler jarııalandy.
Bul týraly astana.kz saıtyna baıqaýdy uıymdastyrýshylar habarlady.
Bıyl baıqaýdyń erejelerine eki negizgi ózgeris engizildi. Birinshiden, ártúrli mólsherdegi aqshalaı syılyqqa Birinshi baıqaýdaǵydaı tek laýreattar ǵana emes, barlyq fınalıster ıe bolady; ekinshiden, júlde qorynda 1,2 jáne 3 syılyqtyń laýreaty atanǵan qatysýshylardyń muǵalimderine arnalǵan aqshalaı marapattar qarastyrylǵan.
«Áleýetti qatysýshylar http://astana-app.kz/ru/ saıtyndaǵy nysandy toltyryp, irikteý kezeńine arnalǵan beınejazbany 2013 jylǵy 18 jeltoqsannan 2014 jyldyń 15 naýryzyna deıin júkteýleri tıis. Іrikteý kezeńi arnaıy qurylǵan komıssııamen ótedi»,- deıdi uıymdastyrýshylar.
Beınejazbalardy kórý qorytyndysy boıynsha, І aınalymǵa qatysýǵa jas aralyq toptar boıynsha - kishi (10 jasqa deıin), orta (11-14 jas aralyǵy) jáne úlken (15-18 jas aralyǵy) 30-dan aspaıtyn pıanıstter jiberiledi. Uıymdastyrý komıteti baıqaýdyń jartylaı fınalyna jiberiletin úmitkerlerdi 2014 jyldyń 1 sáýirinen keshiktirmeı anyqtaıdy.
"AstanaPianoPassion" baıqaýy úsh kezeńmen ótedi: irikteý kezeńi (beınejazba boıynsha), birinshi kezeń (jeke baǵdarlama), ekinshi kezeń (orkestrmen kontsert). Baıqaýǵa álem elderiniń 18 jasqa deıingi pıanısteri qatysady. Jalpy júlde qory 60 000 AQSh dollary, sondaı-aq, baıqaýdyń kórkemdik jetekshisi Denıs Matsýev jáne Astana qalasy ákimdiginiń atynan arnaıy júldeler tapsyrý kózdelgen. Budan basqa, jeńimpazdar Eýropa zaldarynda kontsertter berýge múmkindikke ıe bolady.
"Astana Piano Passion" Halyqaralyq jas pıanıstter baıqaýy ózimen attas klassıkalyq mýzyka festıvali aıasynda Qazaqstannyń elordasy - Astana qalasynda ótpek. Bul baıqaý daryndy balalarǵa ózin búkil álemge tanytýǵa múmkindik beredi. Qatysýshylardyń ónerin bedeldi halyqaralyq qazylar alqasy baǵalaıdy. Baıqaýdy uıymdastyrýshylar - Astana ákimdigi men "Accordi di Astana" qoǵamdyq qory, kórkemdik jetekshisi jáne qurmetti tóraǵasy - Reseıdiń halyq ártisi Denıs Matsýev.
Tolyq aqparatty http://astana-app.kz/ru/ saıtynan bilýge bolady.
