Astananyń zııaly qaýymy kúı anasy Dınaǵa eskertkish ornatylýyn qalaıdy
TANA. 18 qazan. QazAqparat - Astana tórinde kúı anasy Dınanyń sáýletti eskertkishi ornatylǵany jón. Bul qazaqtyń halyq kompozıtory,
ataqty kúıshi Dına Nurpeıisovanyń 150 jyldyǵyna arnalǵan mádenı sharada aıtylǵan negizgi usynys boldy.
Astana qalasyndaǵy Prezıdenttik mádenıet ortalyǵyna jınalǵan ónersúıer qaýymǵa áýeli Dına týraly derekti fılm kórsetildi. Onda kúıshiniń týǵan jeri Batys Qazaqstan oblysynyń, Naryn qumy aımaǵy, Dınanyń ómiri men shyǵarmashylyq joly baıandaldy. Alǵashy bolyp sóz alǵan QR Mádenıet mınıstriniń orynbasary Ǵazız Telebaev ústimizdegi jyly Dına Nurpeıisovanyń 150 jyldyǵy aıasynda elimizdiń ár óńirinde kóptegen is-sharalar atqarylǵanyn aıtyp ótti. Búgingi urpaq tarapynan kúı anasyna qandaı qurmet kórsetilse de, artyq emes ekenin málimdedi.
Qazaqstannyń halyq jazýshysy, Memlekettik syılyqtyń ıegeri, aqyn Farıza Ońǵarsynova tebirene sóz sóılep, ónegeli ómir jolynda 13 bala taýyp, abzal ana da bolǵan, kúı shyǵaryp dana da bolǵan Dına apamyzdaı daryn ıesi eshbir halyqta joq ekenin tilge tıek etti. Astanada Kúıshi Dına kóshesi bar. Alaıda, eńseli bir eskertkishi jetpeı turǵany baıqalady. Farıza aqyn bala kezinen uly kúıshige sáýletti eskertkish ornatylǵanyn armandaıtynyn jetkize kelip, «Minájat» óleńin oqyp berdi. Elimizdiń qaq tórinen óskeleń urpaǵyń keleshekte altynmen aptaǵan eskertkishińdi ornatyp, gúl qoıyp, minájat etetinin óleńimen órnektedi. Dına kúıleri táýelsizdik týy astynda halqymyzdyń azattyǵyn pash etetini týraly júreginen jyr tolǵady.
Batys Qazaqstan oblysynan kelgen aıtysker aqyn Baýyrjan Halıolla kórermenderdi kúı anasy týraly tókpe jyrymen sýsyndatty. Qazaqstannyń eńbek sińirgen ártisi Aıgúl Úlkenbaeva kúıshiniń «Bulbul», «Domalatpaı» kúılerin kúmbirlete tartyp, astanalyq tyńdarmandardyń ystyq yqylasyna bólendi. Aıgúldiń shákirti, ulty orys Andreı Sendrıkov sahnaǵa shyǵyp, Dınanyń «Naýysqysyn» sheber oryndap bergende, tańqalmaǵan jan bolmady. Oǵan kórermender úlken qoshemet kórsetti.
QR Mádenıet mınıstrliginiń uıymdastyrýymen ótken osy mádenı sharada «Aq jaýyn» memlekettik kameralyq orkestri Dına Nurpeıisovanyń «Toıbastar», «Ásemqońyr» kúılerin oryndady. «Serper» dombyrashylar ansambli Dına kúıleriniń toptamasyn kórermen nazaryna usyndy.
Jáne basqa da tanymal dombyrashylar Dınanyń birneshe kúılerin oryndady.
