Astananyń jyr súıer qaýymy Qadyr Myrza Álini eske alýǵa arnalǵan ádebı-mýzykalyq keshten rýhanı qýat aldy
ASTANA. 24 qyrkúıek. QazAqparat - Astananyń jyr súıer qaýymy Qadyr Myrza Áliniń asqaq ta oıly óleńderimen sýsyndady.
Kongress-Holl saraıyna lyq tolǵan kórermen Qazaqstannyń halyq jazýshysy, Memlekettik syılyqtyń laýreaty Qadyr Myrza Álini eske alýǵa arnalǵan ádebı-mýzykalyq keshten rýhanı qýat aldy.
Keshtiń shymyldyǵyn ashqan aqyn, halyqaralyq «Alash» syılyǵynyń laýreaty Esenǵalı Raýshanov: «Asyly, biz baqytty halyq ekenbiz, Qadekeń sııaqty aqynymyz boldy. Qadyr aqynnyń bizge bergeni ne? Biz ony ne úshin jaqsy kóremiz? Ol óıtkeni qazaq degen halyqtyń portretin jasady. Qadekeń týraly áńgime ol qazaq týraly áńgime. Onyń basy bar, biraq aıaqtalmaıdy. Arada jyldar óter, ǵasyrlar óter. Ýaqyt ótken saıyn biz Qadekeńniń qadirin bile túsemiz»,- dedi.
Kelesi kezekte sóz alǵan Qadyr Myrza Áli atyndaǵy qoǵamdyq qordyń dırektory Donedil Qajymov: «Bul Qadyr aǵanyń sońynda qalǵan ushan-teńiz shyǵarmalaryn nasıhattaýǵa, eńbekterin keler urpaqqa jetkizý maqsatynda qurylǵan qor edi. Bul istiń basy-qasynda talaı-talaı jaısańdar júrgenin aıtqanym jón. Sonyń ishinde Nurǵalı Núsipjanov, Іlııa Jaqanov, Eskendir Hasanǵalıev, Aqushtap Baqtygereeva sııaqty qazaqtyń qabyrǵaly azamattary, óner men ádebıettiń maıtalmandary bar. Sonyń arqasynda az ýaqyttyń ishinde biraz dúnıe tyndyryldy dep aıtýǵa bolady. Baspada Qadyr aǵanyń ózi kóre almaı ketken 18 tomdyq tolyq jınaǵy basylyp shyǵyp, alynbaı turǵanda, óz qarajatyna alyp bergen Qundyz Núpov degen azamat. Qadekeńniń kózi tirisinde mundaı keshi Astanada ótpegen edi. Zaıyby Saltanat, tórt jasar nemeresi Músilim kelip otyr»,- dedi.
Jýyrda ǵana Qadyr aǵany eske alý sharasy óziniń kindik qany tamǵan týǵan óńiri Batys Qazaqstan oblysynda ótti. Oǵan oblys ákimi Nurlan Noǵaev bastaǵan azamattar qoldaý jasaǵan.
Osy keshti uıymdastyrýshylar Astana qalasynyń ákimdigine alǵysyn jetkizdi. Jáne de Mádenıet mınıstrligi qoldap otyrǵanyn aıtty.
Osy keshte aqynnyń sózine jazylǵan ánder oryndaldy. Nurǵalı Núsipjanov, Maıra Núrkenova, Gúlnur Orazymbetova, Ábdihan Nurmaǵanbet, Kúlásh Qýanyshqalıeva jáne basqa tanylmal óner ıeleri men jas ánshiler án saldy.
Ánshi Elmıra Jańabergenova aqynnyń Kúltegin poemasyn oryndap berdi. Ánshi Gúlmıra Sarına jáne Ábdiraı Nurpeıis sahnaǵa shyǵyp, Qadyr Myrza Áli óleńderinen «Ana men bala» kompozıtsııasyn kórermen nazaryna usyndy.
Qazaq ulttyq óner ýnıversıtetiniń stýdentteri aqynnyń ómir, qoǵam týraly asqaq jyrlaryn mánerlep oqyp berip, kórermenderdiń yqylasyna bólendi.
Aqyn jubaıy Saltanat osy keshke jınalǵan elordalyqtarǵa rızashylyǵyn bildirdi.
