Astananyń jylý magıstraldaryn jańǵyrtý jumystary 1 qazanda aıaqtalady
«Búgin elordadaǵy jylý magıstraldaryn qaıta jańǵyrtýǵa arnalǵan ınvestıtsııalyq baǵdarlamaǵa sáıkes qolǵa alynǵan nysandardyń birindegi jumys barysymen tanystyra ketýdi jón kórip otyrmyz. Ol – 21-shi jylý magıstrali. Bul - bıyl iske asyrylatyn 12 jobanyń biri. Qazirgi tańda joba aıaqtalýǵa jaqyn qaldy. 1 qazan kúni paıdalanýǵa beremiz», - dedi tilshilerge nysan basynda suhbat bergen «Astana-Teplotranzıt» AQ basshysynyń qurylys jónindegi orynbasary Qurmanǵazy Nuǵymanov.
Onyń aıtýynsha, elordanyń shyǵys bóligindegi jylý magıstrali sonaý 1979 jyly qoldanysqa berilgen.
«Jylý qubyrlarynyń bári tolyǵymen jańa. Jer asty jáne jer ústimen júredi. Jylý magıstrali trassasynyń uzyndyǵy – 594 metr. Bul jerde joǵary bilikti mamandar jumys isteýde. Jumystyń bári kestege saı júrgizilip keledi», - dedi ol.
Qurmanǵazy Nuǵymanovtyń sózine sensek, 12 joba boıynsha jylý magıstralin qaıta jańǵyrtý jumystarynyń arqasynda eski qalada turatyn halyqtyń 70 paıyzy 30 jyl boıy jylý jaǵynan jaısyzdyqty sezinbeıdi. ıAǵnı, bul kásiporyn osyndaı kepildik berip otyr. Jylý magıstraldaryn tartýda 100 paıyz otandyq ónim paıdaǵa jaraǵan.
«Jylý magıstraldaryna jańa aıtyp ketkendeı ınvestıtsııalyq baǵdarlamalar boıynsha qarajat bólingen. Ár nysan boıynsha jospar daıyndap, monopolııaǵa qarsy kúres komıtetine tapsyrǵan bolatynbyz. Mysaly, myna 21-shi jylý magıstralin qaıta jańǵyrtý jumysyna 300 mln teńge jumsaldy. Qala boıynsha dál osyndaı 12 nysan jasalyp jatyr. 1 qazanda bárin bitiremiz. Nysandardyń kóbi Saryarqa, Almaty, Baıqońyr aýdanynda. Jalpy, 12 jobany iske asyrýǵa 1,4 mlrd teńge jumsaldy», - dedi Qurmanǵazy Nuǵymanov.
