Astananyń jol polıtsııasy kúsheıtilgen jumys rejımine aýysty
ASTANA. Qyrkúıektiń 2-si. QazAqparat - Jańa oqý jylynyń bastalýyna baılanysty Astana qalasynyń jol polıtsııasy qyrkúıektiń 9-yna deıin kúsheıtilgen jumys rejımine aýysty. Bul týraly QazAqparatqa jol polıtsııasy basqarmasynyń baspasóz qyzmetinen habarlady.
Basqarmadan habarlaǵandaı, bul kúnderi elordanyń barlyq bilim oshaqtarynyń janynda jol-beket qyzmetiniń narıadtary kezekshilik atqaratyn bolady. Jol polıtsııasynyń qyzmetkerleri dástúrli mektep lıneıkalaryna qatysyp, oqýshylardyń esterine jolda júrýdiń qaýipsizdik erejelerin salady. Qyrkúıektiń 9-yna deıin sondaı-aq, avtojúrgizýshilerge de jol qozǵalysy qaýipsizdigi týraly únparaqtar taratý josparlanýda.
Jol polıtsııasy basqarmasynyń aqparaty boıynsha, jańa oqý jylynyń qarsańynda 8 mekteptiń janyna «Jaıaý júrginshiler ótkeli» degen 16 jol belgisi, al 21 mekteptiń janyna «Balalar» degen 40 eskertý belgisi ornatyldy.
