Astananyń jol polıtsııasy kóliktik baqylaý ınspektsııasymen jáne salyq organdarymen birlesip taksı kólikterine reıd júrgizýde
ASTANA. Qyrkúıektiń 29-y. QazAqparat /Gúlmıra Álıakparova/ - Astananyń jol polıtsııasy kóliktik baqylaý ınspektsııasymen jáne salyq organdarymen birlesip taksı kólikterine reıd júrgizýde.
Bul týraly qalalyq Jol polıtsııasy basqarmasynan málim etti.
«Búgingi kúni qalada QR Úkimetiniń qaýlysymen bekitilgen «Elordada avtomobıl kóligimen jolaýshylar men júkterdi tasymaldaýdyń erejeleri» jumys isteıdi. Osy erejelerge sáıkes barlyq taksomotorly kompanııalar tasymaldaýdy júzege asyrý úshin ruqsat alýy tıis, alaıda ol ruqsat birde-bir kompanııada joq», - dep atap ótti Jol polıtsııasy basqarmasynan.
Sondaı-aq, JPB-dan málim etkendeı, barlyq taksı kólikterinde perımetr boıynsha arnaıy jolaqtar, taksometrler men radıobaılanys bolýy tıis. Sondaı-aq, barlyq mashınalar bir túske boıalyp, olardyń tóbesinde «TAXI» belgisi ornatylýy qajet. Al júrgizýshiler belgilengen úlgidegi formalyq kıimde bolý kerek.
«Reıdtiń nátıjesi kórsetip otyrǵandaı, tasymaldaýshylardyń kólikteri Qaýlynyń talaptaryna saı kelmeıdi. Onyń ústine taksomotorly kompanııalar jolaýshylar tasymalynyń qarapaıym qaýipsizdik erejelerin saqtamaı otyr. Máselen, olar sapar aldynda óz júrgizýshilerin medıtsınalyq, al avtokólikterin tehnıkalyq tekseristerden ótkizbeıdi», - dedi JPB-dan.
Búgingi kúni Astanada jolaýshylardy taksı kólikterimen tasymaldaýdyń eki sanaty bar. Olardyń biri - ózderiniń avtomashınalar parki bar, biraq kásiporynnyń atyna tirkelgen kólik quraldaryn qoıatyn turaqtary joq kompanııalar. Ádette olardyń kólikteri úı mańyna qoıylady.
Ekinshi sanatqa - jekemenshik kólikterdi tarta otyryp, salyq organdarynyń jarǵylary negizinde jumys istep otyrǵan jekemenshik kásipkerler jatady.
Reıdterdiń nátıjesinde, JPB 2010 jyldyń ótken 8 aıynda taksı kólikteriniń jol júrý erejelerin buzǵan 1825 faktisin anyqtady. Onyń 579-ynda kólikter tehnıkalyq jaramsyz kúıde bolǵan. 222-si toqtaý, turaqqa turý, jolaýshylardy tasymaldaý erejelerin buzǵandar, al 247-si - memlekettik tehnıkalyq tekserýden ótpegen. Sonymen qatar, túrli buzýshylyqtar úshin 272 taksı kóliginen memlekettik nómirler alynyp, olar ýaqytsha saqtaý turaǵyna jetkizildi.
