Astananyń JITS ortalyǵyna jańa jyljymaly senim pýnkti berildi
ASTANA. QazAqparat - Elordanyń JITS-tyń aldyn alý jáne oǵan qarsy kúres ortalyǵy ekpe arqyly esirtki qabyldaıtyndar men jynystyq qyzmet kórsetetin adamdardy tekserýge arnalǵan zamanaýı jyljymaly senim pýnktin aldy, dep habarlaıdy QazAqparat.
«Buǵan deıin de qalamyzda eki jyljymaly senim pýnkti jumys istep kelgen edi. Al qazir alǵan avtokólik zaman talabyna saı jabyqtalǵan ári dárgerlerdiń tyńǵylyqty jumys atqarýyna barlyq jaǵdaı qarastyrylǵan», - deıdi atalmysh mekemeniń aldyn alý bóliminiń meńgerýshisi Qarlyǵash Kúzembaeva.
Onyń aıtýynsha, jańa jyljymaly senim pýnkti Mercedes Sprinter markaly avtokólik negizinde arnaıy tapsyrys boıynsha jınalǵan. Kólik qurlymy zaman talabyna saı, qoldanysqa qolaıly, barlyq qaýipsizdik talaptaryna sáıkestelgen.
«Onda eki mamannyń bir mezgilde qabyldaý júrgizýine jáne AITV-ınfektsııasyna jedel testileý ótkizýine múmkindik bar. Sondaı-aq jumys oryndary jalpy jáne jergilikti jaryqpen, bakterıtsıdtik shammen, qysqy ýaqytta aýany jylytatyn, al jazǵy kezeńde aýany salqyndatatyn júıemen jabdyqtalǵan, salonnyń ishki betteri ońaı zalalsyzdandyrylady. Bul biz úshin aldyn alý sharalarynyń tıimdiligin jáne joǵary táýekel toptarynyń ortalyq qyzmetine qoljetimdiligin arttyrýǵa septigin tıgizetinine senimdimiz», - dedi ol.
Jyljymaly senim pýnktiniń negizgi maqsaty - táýekel toptary arasynda jańa juqtyrý jaǵdaılaryn boldyrmaý. Mamandar árbir kelýshige AITV-nyń aldyn alý sharalary jáne juqtyrý qaýpin azaıtý týraly jeke keńester, AITV-ǵa testiden ótý mańyzdylyǵy jóninde túsindirme jumystaryn júrgizedi.
