Astananyń jer telimderine tolyqtaı túgendeý júrgiziledi

Bul týraly búgin Astana ákimi Á.Jaqsybekovtiń tóraǵalyǵymen ótken elorda ekonomıkasyn jaqsartý máselelerine arnalǵan jıynda qalalyq memlekettik kirister departamentiniń basshysy Ábilqaıyr Sqaqov málim etti.

«Túrli deńgeılerde jerdiń tıimsiz paıdalanýyna qatysty másele jıi kóteriledi. Jerdiń paıdalanylýyn baqylaý tıimdiligi ókiletti organdardyń «las málimetteri» problemasymen kúrdelengen. Bul óte kókeıtesti másele jáne ol barlyq memlekettik organdar men halyqqa qatysty», - dedi departament basshysy.

Máselen, onyń atap ótýinshe, elordanyń sol jaǵalaýyndaǵy bolashaǵy zor aýdannan «Asyl Aımaq» JShS-ine 222 gektar jer aýyl sharýashylyǵy maqsatyna berilgen. Bul da jer qatynastary salasyndaǵy problemalardy bildiredi.

«Sondyqtan da búginde elordanyń jer telimderine tolyqtaı túgendeý júrgizý qajettigi týyndap otyr», - dedi ol.