Astananyń jer aýmaǵy keńeıedi
ASTANA. QazAqparat - Búgin Astana qalasy Qoǵamdyq keńesiniń otyrysynda qalanyń shekarasy keńeıe túsetini málim boldy. Astana halyqaralyq áýejaıynyń ushyp-qoný jolaǵyn qaıta jóndeý kezinde jańa termınal salý úshin jalpy aýdany 347,60 ga jer telimi bólinetin bolady. Sonymen qatar, jalpy aýdany 1419 gektar jer QR Ulttyq pansıonyn, sondaı-aq, qalalyq zırat salýǵa berilmek, dep habarlaıdy ákimdiktiń baspasóz qyzmeti.
- 2014 jylǵy 11 qarashadaǵy «Nurly jol - bolashaqqa bastar jol» Qazaqstan halqyna Joldaýynda aıtylǵan Memleket basshysynyń tapsyrmasyna sáıkes, ákimdik múddeli memlekettik organmen birlesip, Astana halyqaralyq áýejaıynyń ushyp-qoný jolaǵyn qaıta jóndeý kezinde jańa termınal salý máselesin pysyqtady. Osy maqsatta jalpy aýdany 347,60 gektar jer bólinbek, onda tekserý, tıisti nysandar qurylysyn jobalaý jumystary júrgizildi. Bul rette áýejaı aýmaǵyn, onyń qorǵalatyn aımaqtaryn keńeıtý, atalǵan aýmaqtardy sý basýdy boldyrmaý boıynsha keshendi sharalar júrgizý qajettiligi týyndaıdy. Alaıda, Aqmola oblysy Tselınograd aýdanyndaǵy Maıbalyq kóliniń janynda qalaǵa irgeles jatqan jalpy aýdany 7300 gektar qosymsha jerdi Astananyń aýmaǵyna qosyp almastan, bul sharalardy iske asyrý múmkin emes, - dedi Astana qalasynyń jer qatynastary basqarmasynyń basshysy Tóleýǵazy Nurkenov óz baıandamasynda.
Sonymen qatar, Basqarma basshysy aýmaqtyń bir bóliginde elorda turǵyndary men qonaqtarynyń demalýyna arnalǵan aımaq qurýdy usyndy.
Astananyń ákimshilik shekarasyn ózgertý aıasynda Qabanbaı batyr jáne Talapker aýyldyq okrýgterinde ornalasqan jalpy aýdany 1419 gektar jerdi qalaǵa berý usynyldy. Bul jerler Memleket basshysynyń QR ulttyq panteonyn, sondaı-aq jańa qalalyq zırat salý boıynsha tapsyrmasyn oryndaýdy qamtamasyz etý úshin qajet. T. Nurkenovtyń aıtýynsha, zırat Kókshetaý tasjolynyń boıynda MAI beketinen keıin ornalaspaq.
Atalǵan joba Qoǵamdyq keńes múshelerimen biraýyzdan bekitildi.
Qazirgi kezde bul jerler atalǵan nysandardy jobalaý jáne salý úshin Astana qalasynyń kommýnaldyq sharýashylyq basqarmasyna turaqty jer paıdalaný quqyǵyna berildi.
