Astananyń jasyl beldeýinde 10 mln aǵash pen 1,8 mln buta ósip-ónip jatyr
NUR-SULTAN. QazAqparat - Elordada bıyl 30 myń aǵash otyrǵyzylady, dep habarlaıdy QazAqparat.
Qalada tal egý, jasyl beldeýdi qalyptastyrý jáne ekologııalyq aýmaqtar qurýda jumystar qarqyndy túrde júrgizilip jatyr.
«Otyrǵyzylǵan kóshetterdiń ósýi úshin birneshe jyl ýaqyt kerek ekenin bilemiz. Árıne ekkennen keıin olardy kútip taptaý kerek. Bizdiń kommýnaldyq qyzmetkerler qolaısyz aýa raıyna qaramastan eńbektenip júr. Qala turǵyndary da ósimdikterge uqypty qaraýy qajet. Ósimdikterdi qorǵaý maqsatynda jasyl kóshetterdi kútý ári qorǵaý erejeleri kúsheıtildi. Buryn kesilgen bir aǵashtyń ornyn toltyrý úshin bes aǵash egiletin. Endi bir aǵash kesilse, onyń ornyna on aǵash otyrǵyzý kerek bolady» dep jazdy shahar basshysy Altaı Kólginov Instagram paraqshasynda.
Onyń aıtýynsha, bıyl 30 myń aǵash otyrǵyzylady. Jumys elordanyń barlyq aýdanynda júrip jatyr.
«Jasyl beldeýde 330 myń japyraqty jáne qylqanjapyraqty aǵash, 3 myńnan astam kóshetke deıin egemiz. Jalpy, qazir jasyl beldeý aýmaǵynda 10,2 mln astam aǵash pen 1,8 mln buta (qaraqat, moıyl, bórijıdek, kóriktal) ósip-ónip jatyr. Aýlalar, saıabaqtar, skverler men býlvarlardy abattandyrý kezinde, qurylys barysynda aýmaqty kógaldandyrýǵa erekshe mán beremiz. Ósimdikter keýip ketpes úshin sýarý júıesin 20%-dan 90%-ǵa deıin qalpyna keltirdik» deıdi elorda ákimi.
Memleket basshysy halyqqa Joldaýynda ekotýrızm mádenıetin damytý mańyzdy mindet ekenin aıtqan bolatyn.
«Biz osy maqsatta ekosaıabaqtar qurý boıynsha jumys atqaryp jatyrmyz. Olar halyq jınalatyn oryn ǵana bolmaı, qala ekologııasyn birshama jaqsartýǵa da múmkindik beredi» deıdi Altaı Kólginov.
