«Astananyń» jankúıerleri fýtbol klýbynyń ánuranyn ózderi oılap taba alady - Bas menedjer
ASTANA. QazAqparat - Álemdegi fýtbol klýbtarynyń arasynda ánurany eń ataqty «Lıverpýl» komandasynyń ánuranyn jankúıerlerdiń ózi oılap tapqan.
Sol sııaqty, «Astana» fýtbol klýbynyń ánuranyn da jankúıerlerdiń ózi oılap tapsa, ánuran barynsha tanymal ári shyn júrekten aıtylar edi, deıdi klýbtyń bas menedjeri Qaısar Bekenov.
30 qyrkúıek kúni ótetin «Astana-Galatasaraı» matchynyń daıyndyǵyna arnalǵan baspasóz máslıhatynan soń birqatar jýrnalısterdiń suraǵyna jaýap bergen ol klýbtyń ánuranyn arnaıy jazdyrǵannan góri, jankúıerlerdiń ózderi tańdaǵan án shynaıy bolady deıdi.
«Barselona», «Real», «Benfıka» klýbtaryn alyp qarasaq ta, olardyń ánurandary arnaıy jazylmaǵan, komandanyń damýymen birge, jankúıerler jaqsy kórgen ánderin aıtyp, on-jımyrma jyl ishinde sol fýtbol klýbtarynyń gımnderine aınalǵan. Mysaly, álemdegi fýtbol klýbtarynyń arasynda ánurany eń ataqty «Lıverpýl» klýbyn alaıyq, ol ándi klýb tapsyryspen jazdyrǵan joq, komandanyń oıyndaryna jınalǵan jankúıerler sol ándi aıta bergen soń, klýb resmı ánurany retinde tirkedi», - deıdi oıyn bildirgen Q.Bekenov.
««Astana» klýbynyń da ánurany paıda bolady, oǵan shúbá keltirmeımin. Án degenimiz - óz aldyna jeke tvorchestvo, sondyqtan, klýb arnaıy tapsyrys berip jazdyrǵannan qaraǵanda, jankúıerlerdiń janyna jaqyn, ózderi tańdap alǵan ánderi bizdiń gımnge aınalsa, shynaıy bolar edi. Múmkin tipti, qazaqtyń halyq ánderiniń biri «Astananyń» gımne aınala alady»,-deıdi ol.
Esterińizge sala keteıik, «Astana» fýtbol komandasy Qazaqstan fýtbolynyń tarıhynda tuńǵysh ret ÝEFA Chempıondar lıgasynyń toptyq kezeńine ótken komanda. Toptyq kezeńde «Astana» «S» tobynda oınaıdy. 15 qyrkúıek kúni Portýgalııada «Benfıkaǵa» qarsy oınaǵan elordanyń klýby qarsylasqa 0:2 esebimen ese jibergen bolatyn.
