«Astananyń jańa ýnıversıtetine» qabyldanatyn stýdentterdi irikteýdiń alǵashqy kezeńi aıaqtaldy - Q. Daıyrova
ASTANA. Sáýirdiń 29-y. QazAqparat /Gúlmıra Álıakparova/ - «Astananyń jańa ýnıversıtetine» qabyldanatyn stýdentterdi irikteýdiń alǵashqy kezeńi aıaqtaldy. Bul týraly búgin QR Tuńǵysh Prezıdentiniń ıntellektýaldyq mektebinde ótken baspasóz máslıhatynda atalmysh ýnıversıtettiń vıtse-prezıdenti Qadısha Daıyrova málim etti.
Q.Daıyrovanyń aıtýynsha, búgingi kúni Qazaqstannyń soltústik jáne ońtústik óńirlerinde «Astananyń jańa ýnıversıtetine» stýdentterdi qabyldaýdyń alǵashqy irikteý kezeńi aıaqtaldy. Oǵan qatysqan 600 úmitkerler aǵylshyn tilin bilýdiń - VSERT deńgeıi boıynsha test tapsyryp, olardyń 91 paıyzy óz bilimderin dáleldegen. Endi olar aǵymdaǵy mamyr aıynyń basynda Almaty men Astana qalalarynda ótetin ekinshi irikteý - IELTS testileýine shaqyrylady. IELTS abıtýrıenttiń aǵylshyn tilin tereń bilý deńgeıin anyqtaıtyn bolady. Budan keıin - SET, ıaǵnı mamandyqqa sáıkes pánder boıynsha emtıhan tapsyrylady. Q.Daıyrovanyń sózine qaraǵanda, jastardyń ıntellektýaldyq jáne syn turǵysynan oılaý qabyletteri de nazarǵa alynatyn bolady.
Aıta keteıik, irikteý komıssııasyna Ulybrıtanııanyń Qazaqstandaǵy Elshiliginiń janynda jumys isteıtin Brıtan keńesi (UCL) tóraǵalyq etýde, «Astananyń jańa ýnıversıteti» olarǵa tek qolǵabys bildirýde.
Búginde zamanaýı oqý orny, óziniń jumysynyń alǵashqy jylyn qandaı pánderden bilim berýden bastaıtynyn anyqtap, bekitti. Olar - Injenerlik mektep, ǵylym mektebi, jaratylystaný ǵylymdary jáne áleýmettik-gýmanıtarlyq ǵylymdar.
