Astananyń jańa ýnıversıteti ulttyq bilim brendine aınalýy tıis
ALMATY. Jeltoqsannyń 9-y. QazAqparat /Erbol Azanbek/- «Astananyń jańa ýnıversıteti» eldi ındýstrııaldy-ınnovatsııalyq damytý mindetterin sheshý úshin ulttyq ınjenerlik-tehnıkalyq jáne ǵylymı kadrlardy daıarlaý sapasyn jaqsartý maqsatynda quryldy. Bul týraly búgin Almatyda arnaıy baspasóz máslıhatyn ótkizgen Ýnıversıtet basshylary aıtty,
dep habarlaıdy QazAqparat.
«Astananyń jańa ýnıversıteti» - Qazaqstan astanasynda halyqaralyq dárejedegi oqý ornyn qalyptastyrý baǵytyndaǵy aýqymdy joba. Elbasy tapsyrmasymen qurylǵan bul oqý orny ulttyq bilim berý júıesiniń barlyq jetistikteri men álemdik bilim-ǵylym tájirıbesiniń ozyq úlgilerin boıyna toǵystyrǵan, Qazaqstannyń ulttyq brendine aınalýy tıis», dedi Ýnıversıtet prezıdenti Aslan Sarınjapov. Onyń aıtýynsha, ýnıversıtettiń damý strategııasyna sáıkes «Astananyń jańa ýnıversıteti»AQ-yn basqarý kompanııasynan birtindep ulttyq ǵylym-bilim keshenine aýystyrý kózdelgen. Keshen quramynda Prezıdent atyndaǵy ýnıversıtet, álemdik deńgeıdegi ǵylymı ortalyqtar men endaýment-qor bolmaq.
Sonymen qatar ýnıversıtette ınjenerlik, naqty ǵylymdar, medıtsına mektebi (fakýltetter) ashylady. Bularda bakalavrıat boıynsha 2011, magıstratýra boıynsha 2010 jyldan bastap bilim berile bastaıdy.Al magıstratýra men PhD boıynsha bıznes pen memlekettik saıasat mektebi 2012 jyly ashylmaq. Al alǵashqy 700-ge jýyq bilim alýshylar 2010 jyldyń qyrkúıeginen bastap qabyldanbaq.
