Astananyń jańa temir jol vokzaly men termınaly paıdalanýǵa berilgen sátten 500 myńnan astam jolaýshyǵa qyzmet kórsetti

Bul týraly búgin Úkimette «Nurly jol» memlekettik baǵdarlamasynyń 2017 jyldyń  I-jartyjyldyǵynda iske asyrylýynyń negizgi qorytyndysyn talqylaý barysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.

 «Aǵymdaǵy jyldyń 31 mamyrynda Astananyń jańa temir jol vokzaly paıdalanýǵa berilgen bolatyn. Jańa vokzaldyń ótkizý qabileti táýligine 35 myń, al eski vokzaldy qosa alǵanda táýligine 47 myń jolaýshyny quraıdy. Bul halyqaralyq kórmeni ótkizý kezeńin qosa alǵanda elordanyń jolaýshylar legine qyzmet kórsetýdi tolyqtaı qamtamasyz etedi. Temir jol vokzaly paıdalanýǵa berilgennen bastap shamamen 305 myń jolaýshyǵa qyzmet kórsetti», - dedi Jeńis Qasymbek.

Sonymen qatar ol Astana áýejaıynyń jańa termınalynyń qurylysy men ushý-qoný jolaǵyn jańǵyrtý jumystary aıaqtalǵandyǵyn eske salyp ótti.

«Ótkizý qabileti  - jylyna 8,2 mln  nemese saǵatyna 2525 jolaýshy. Joba quny - 92 mlrd teńge. Maýsym aıynan beri jańa termınal «LOT Polish Airlines», «WizzAir», «FinnAir», «Air China», «Lufthansa», «Air Arabia» syndy 19 sheteldik avıatasymaldaýshynyń halyqaralyq reısterine qyzmet kórsetedi. Buǵan qosa, Delıge, Varshaǵa, Helsınkıge, Býdapeshke, Beıjińge, Erevanǵa, Kıevke, Batýmıge, Mıneraldy sýlarǵa jańa reıster ashyldy. Aǵymdaǵy jyly Astana qalasy áýejaıyndaǵy jolaýshylar leginiń artýy ótken jyldyń sáıkes kezeńimen salystyrǵanda 19 paıyzdy nemese 1,8 mln  jolaýshyny qurady. Jańa jolaýshylar termınaly paıdalanýǵa berilgen sátten bastap halyqaralyq reısterdiń 227 jolaýshysyna qyzmet kórsetti»,-  dedi mınıstr.