Astananyń jańa ákimine qandaı mindetter júkteldi

ASTANA. QazAqparat - Astanada QR Premer-Mınıstri Álıhan Smaıylov pen QR Prezıdenti Ákimshiliginiń Basshysy Murat Nurtileýdiń qatysýymen máslıhat depýtattarynyń jınalysy ótti, dep habarlaıdy QazAqparat Úkimettiń resmı saıtyna silteme jasap.

Depýtattardyń qaraýyna elorda ákimi laýazymyna Berik Oraluly Jakenov pen Jeńis Mahmuduly Qasymbektiń kandıdatýralary usynyldy. QR Prezıdentiniń tıisti hatyn Álıhan Smaıylov oqyp berdi.

Ashyq daýys berý qorytyndysy boıynsha 21 depýtat J. Qasymbekti tańdasa, 7 depýtat B. Jakenovke daýys berdi. Jınalysqa barlyǵy 28 depýtat qatysty.

Osydan keıin elorda aktıvimen ótken kezdesýde Álıhan Smaıylov qalanyń belsendi túrde damyp kele jatqanyn, turǵyndar sanynyń 4,5 ese óskenin atap ótti. Qurylys qarqyny da ósti: 2019 jyldan bastap 10 mln sharshy metrden astam turǵyn úı paıdalanýǵa berildi.

«Osyǵan baılanysty turǵyndardy sapaly aýyz sýmen, elektrmen, jylý qýatymen jabdyqtaý, áleýmettik nysandaryn jańǵyrtý máselelerin sheshý – jergilikti atqarýshy bıliktiń aldyna qoıylatyn basym mindetter», — dedi Premer-Mınıstr.

Onyń aıtýynsha, jańa tazartý qurylystarynyń keshenin, birqatar shaǵyn elektr stantsııalaryn, JEO-3 jáne gazben jumys isteıtin birneshe JES-ti iske qosý, turǵyn úı alaptaryn abattandyrý boıynsha jumysty jandandyrý, sondaı-aq barlyq problemalyq turǵyn úı obektileriniń qurylysyn aıaqtaý qajet.

Álıhan Smaıylov sońǵy jyldary Astananyń áleýmettik ınfraqurylymyna, atap aıtqanda, aýrýhanalar men mektepterge júkteme artqanyn atap ótti. Osyǵan baılanysty memleket osy máselelerdi sheshý boıynsha sharalar qabyldap jatyr. Mysaly, «Jaıly mektep» jańa ulttyq jobasy aıasynda elordada aldaǵy jyldary 44,4 myń oqýshyǵa arnalǵan jańa formattaǵy 24 mektep ashylady.

Basqa mańyzdy baǵyttar retinde Premer-Mınıstr turaqty jumys oryndaryn qura otyryp, iri ınvestıtsııalyq jobalardy iske qosýdy jáne kásipkerlik qyzmetti júrgizý úshin qolaıly jaǵdaılar jasaý kerek ekenin aıtty.

«Shaǵyn jáne orta bıznes ekonomıkalyq ósýdiń berik draıveri bolý kerek. Eger buryn Astana memlekettik qyzmetshilerdiń qalasy bolsa, qazir ol – kásipkerlerdiń qalasy. Elordanyń árbir úshinshi turǵyny shaǵyn jáne orta bıznes salasynda jumys isteıdi. Osyǵan oraı bızneske kedergi keltiretin barlyq qıyndyqtardy joıý qajet», — dedi ol.

Sonymen qatar Premer-Mınıstr sapaly azyq-túlik ónimderin óndirý kólemin ulǵaıtý, ózekti ekologııalyq máseleler men nóser káriz júıesiniń jumys isteýi boıynsha problemalardy sheshý qajettigin atap ótti.

«Jergilikti atqarýshy organdardyń jumysy halyqpen nátıjeli dıalog negizinde qurylyp, óńirdiń ary qaraı damýyna jáne turǵyndardyń ál-aýqatyn kóterýge baǵyttalýy kerek», — dep túıindedi Álıhan Smaıylov.

Foto: primeminister.kz