Astananyń jańa ákimi Jetisý jármeńkesinen alma satyp aldy
ASTANA. QazAqparat - Astana qalasynyń jańa ákimi Baqyt Sultanov pen Almaty oblysynyń ákimi Amandyq Batalov elordadaǵy Jetisý óńiriniń aýylsharýashylyq jármeńkesin aralady, dep habarlaıdy QazAqparat tilshisi.
Qalanyń jańa basshysymen júzdesken Astana turǵyndary osyndaı arzan jármeńkelerdi kóptep uıymdastyrý qajettigin jetkizdi.
Ákimder jemis-jıdek, kókónis, et, sút ónimderi qoıylǵan sórelerdi aralady jáne ónimderdiń sapasy men baǵasyn tekserdi. Almatynyń tanymal aportyn kórgen Baqyt Sultanov ámııanyn shyǵaryp, bir paket alma satyp aldy.
Sondaı-aq, jármeńkeden kókónis alyp júrgen sheneýnikter arasynda Parlament Májilisi tóraǵasynyń orynbasary Vladımır Bojko, Májilis depýtaty Zaǵıpa Balıeva da bar. Olar B. Sultanovty jańa qyzmetimen quttyqtady. Óz kezeginde jańa ákim áriptesterine sáttilik tiledi jáne jyly qoshtasyp, taksıge minip ketti.
Aıta keteıik, Astanadaǵy «Qazaqstan» sport kesheni janynda Almaty oblysynyń aýylsharýashylyq ónimderi arzan baǵamen satylýda. Jalpy kólemi 470 tonnadan asatyn Jetisý ónimderi elordada eki kún boıy saýdalanbaq. Ondaǵy taýarlar naryqtaǵy baǵadan 10-25% deıin, keı ónimder tipti 33% deıin arzan satylyp jatyr.
