Astananyń velosıpedshileri 3 túrli sanatqa bólinbek
ASTANA. QazAqparat - Astanada aldaǵy bes jylda velosıpedshilerge arnalǵan úsh túrli marshrýt paıda bolady, dep habarlaıdy QazAqparat ákimdiktiń Medıa ortalyǵyna silteme jasap.
«Astana bas jospary» ǵylymı-zertteý jobalaý ınstıtýtynan málim etkendeı, kóshedegi jol qozǵalysynyń júktemesin azaıtý maqsatynda velosıped ınfraqurylymyn damytý jospary júzege asyrylýda.
«Atalǵan jobaǵa sáıkes Astanada kúndelikti-iskerlik (ýtılıtarly), rekreatsıondy jáne týrıstik velomarshrýttar paıda bolady. Alǵashqysy kúndelikti bir núkteden kelesi bir jerge deıin (mysaly jumysqa) jetý maqsatynda engiziledi. Ekinshisi qaladaǵy saıabaqtar men basqa da landshafty-rekreatsııalyq aımaqtarda velosıped baǵyttaryn damytýdy kózdeıdi. Al úshinshisi qalanyń týrıstik áleýetin damytýǵa baǵyttalǵan», - delingen habarlamada.
Sondaı-aq Astananyń ákimshilik aýdandarynyń árqaısysynda ýaqytsha velosıped marshrýttaryn damytý josparlanyp otyr. Bul baǵyttar qoldanystaǵy velosıped ınfraqurylymynyń suranysyn qanaǵattandyryp, demalys jáne mereke kezindegi joldaǵy júktemeni azaıtýǵa septigin tıgizbek.
«Tujyrymdamaǵa sáıkes, Astana qalasyndaǵy velosıped marshrýttarynyń jalpy uzyndyǵy 1717 shaqyrymdy quraıdy. Onyń 1362 shaqyrymy - ýtılıtarly, 233 shaqyrymy - rekreatsııalyq, 32,6 shaqyrymy - týrıstik jáne 19,4 shaqyrym ýaqytsha baǵdarlar bolady», - delingen ınstıtýt taratqan habarlamada.
Aldaǵy ýaqytta Astanada paıda bolatyn velomarshrýttar qyzǵylt sary túste bolady.
