Astananyń úzdik jol polıtseıi anyqtaldy

Bul mártebeli ataqqa jeke mamandandyrylǵan batalonnyń aǵa ınspektory, polıtsııa kapıtany Baqytáli Tólegenov ıe boldy.

«Óz kásibiniń úzdigi» baıqaýynda ol jol qozǵalysy erejesin, zańnamany bilý, fızıkalyq jáne qarýdan oq atý daıyndyǵy, is júzinde kóshe qıylysyndaǵy jol qozǵalysyn retteý, sholǵynshy avtomobılimen jáne júk kóligimen jyldamdyqpen epti júrý, sondaı-aq alǵashqy medıtsınalyq kómek kórsetý syndy saıystarda úzdik tanyldy.

Budan bólek aıta keterligi, B.Tólegenov kezekten tys attestattaýdyń barlyq kezeńinen úzdik kórsetkishpen ótken bolatyn. 

«Polıtseılerde jumys kúni normalanbaǵan. Sondyqtan da men kún saıyn tańǵy 5-te turyp, bir saǵat boıy taza aýada dene shynyqtyramyn», - deıdi ol.

Aldaǵy ýaqytta polıtsııa kapıtany «Óz kásibiniń úzdigi» respýblıkalyq baıqaýynyń aqtyq synyna qatysady.