Astananyń úzdik oqýshysy anyqtaldy
ASTANA. QazAqparat - Elordada QR Tuńǵysh Prezıdenti kúnin merekeleý aıasynda «Elordalyq bilim berý mekemeleriniń kóshbasshy oqýshysy» zııatkerlik baıqaýy ótti. Sharany uıymdastyrýshy - Astana qalasy Bilim basqarmasynyń «Astana daryny» ÓǴPO, dep habarlaıdy elorda ákiminiń resmı saıty.
Bıyl baıqaý taqyryby Qanysh Sátpaev, Evneı Bóketov, Álimhan Ermekov syndy Qazaqstannyń belgili ǵalymdaryna, halqymyzdyń patrıottaryna, qazaq, orys jáne álemdik mádenıet bilgirlerine arnaldy. Baıqaýǵa jalpy bilim beretin mektepterdiń 10-synyp oqýshylary qatysty.
Úsh kezeńnen turǵan aqtyq synǵa 16 adam ótti. Olar jalpy erýdıtsııa boıynsha suraqtarǵa jaýap berip, «Qazaqstan ǵalymdary: Q. Sátpaev, E.Bóketov, Á. Ermekov» vıktorınasyna qatysty, sondaı-aq berilgen taqyryptarǵa mátin daıyndady.
Baıqaý qorytyndysy boıynsha kóshbasshylar arasynda № 60 lıtseıdiń oqýshysy Aısulý Asylbekova jeńimpaz atandy.
«Menińshe bul baıqaý ózińniń kóshbasshylyq qasıetterińdi kórsetýge, bilim alýǵa zor múmkindik beredi, bul baıqaý patrıotızm sezimin damytýǵa septigin tıgizedi, al bul óte mańyzdy. Maǵan kómektesip, keńesterin bergen barlyq mektep ustazdaryna alǵysymdy bildiremin», - deıdi A. Asylbekova.
Birinshi oryn № 40 mektep oqýshysy Emanǵalıeva Kamılaǵa buıyrsa, № 52 orta mektep oqýshysy Bazarhan Damır men № 64 mektep-lıtseı oqýshysy Ábilbekova Adal 2-oryn aldy. № 62 mektep-lıtseıdiń oqýshysy Tursunqanova Ánel, № 66 mektep-lıtseıdiń oqýshysy Quramysova Aqnıet jáne № 38 mektep-lıtseıdiń oqýshysy Dosbolov Dıasjan 3-oryndy ıelendi.
Baıqaý jeńimpazy men júldegerler dıplomdarmen, gramotalarmen jáne baǵaly syılyqtarmen marapattaldy.
