Astananyń úzdik dárigerlerine «Kann júldesi» tabystaldy

Júlde ıdeıasynyń negizi retinde Kann kınofestıvaliniń «Altyn palma butaǵy» alynyp otyr. «Altyn shıpager» músinshesinde lavr japyraqtary beınelengen, bul densaýlyq pen uzaq ǵumyrdy bildiredi.

Alǵashqy marapattaý keshinde biliktiligimen jáne kásibıligimen kózge túsken medıtsına mamandary «Jyl dárigeri», «Úzdik epıdemıolog», «Mamandyǵyna adaldyq», «Tsıfrlandyrý kóshbasshysy», «Densaýlyq saqtaý isiniń úzdik menedjeri», «Biregeı ota jasaǵany úshin», «Úzdik jedel-járdem brıgadasy» syndy 10 atalym boıynsha marapattaldy.

Saltanatty sharany ashqan Astana qalasynyń ákimi Áset Isekeshev medıtsına salasyna qosqan úlesi úshin el alǵysyna bólengen ardager dárigerlerdi marapattady. Olardyń arasynda Serik Aqsholaqov, Myrzakárim Alshynbaev, Abaı Baıgenjın, Nurlan Batpenov, Valerıı Benberın, Maqsut Quljanov, Qadyr Omarov, ıÝrıı Pıa jáne Nadejda Petýhova bar.

«Jyl dárigeri» nomınatsııasy  №1 qalalyq aýrýhananyń Otolarıngologııa ortalyǵynyń jetekshisi Gúlmıra Muhamedıevaǵa berildi.

Al «Úzdik epıdemıolog» atalymynda 20 jyldan astam ýaqyt boıy qaladaǵy epıdemıologııalyq jaǵdaıdy baqylap kele jatqan Sarhat Saǵyntaıqyzy Beısenova jeńimpaz atandy.

 Sondaı-aq, medıtsına qyzmetkerleri kúninde belgili opera ánshisi Súndet Baıǵojın de marapatqa ıe boldy. Bul erekshe júlde ánshige naýqastarǵa qol ushyn sozyp, qaıyrymdylyq jasaǵany úshin berildi.

Taǵy bir biregeı nomınatsııalardyń biri - «Dıagnostıka men emdeýdiń jańa ádisin engizgeni úshin» dep atalady. Bul marapat Onkologııalyq ortalyqtyń Bas jáne moıyn qaterli isigi bóliminiń meńgerýshisi Darhan Ahmedınge berildi.

Aıtýly keshte QR Parlamenti Májilisiniń depýtaty Záýresh Amanjolova «Mamandyqqa adaldyq» atalymynyń jeńimpazyn marapattady. Júldeni medıtsına ǵylymdarynyń kandıdaty, «Astana» medıtsınalyq ýnıversıteti AQ Densaýlyq saqtaýdaǵy menedjment jáne saraptamalyq qyzmet dotsenti Balabı Aıǵojın jeńip aldy.

«Densaýlyq saqtaý isiniń úzdik menedjeri» atalymynda №2 qalalyq aýrýhananyń bas dárigeri Ivan Lı úzdik dep tanyldy. Atap ótken jón, №2 qalalyq aýrýhana - dıagnostıka men emdeýdiń joǵary tehnologııalyq ádisteri engizilip jatqan qarjylyq turaqty klınıkalardyń biri.

Sonymen birge, Aıgúl Qasymova basqaratyn №8 qalalyq emhana «Tsıfrlandyrý kóshbasshysy» syılyǵymen marapattaldy. Bul emhana - barlyq bıznes-protsesteri avtomattandyrǵan, densaýlyq saqtaý salasyn tsıfrlandyrýdaǵy alǵashqy mekemelerdiń biri.

«Biregeı ota jasaǵany úshin» - №1 perınataldy ortalyǵy neonataldy hırýrgııa bóliminiń jetekshisi Asyljan Erekeshev marapattaldy.

Aıta keteıik, Erekeshevter otbasy mamyr aıynda ótken qalalyq «Mereıli otbasy» baıqaýynda top jarǵan bolatyn.

«Jeke medıtsınalyq qyzmetti úzdik jetkizýshi» atalymy boıynsha «Salaýatty Astana» medıtsınalyq ortalyǵy úzdik atandy. Al «Úzdik jedel járdem brıgadasy» ataǵy men bir jarym mıllıon teńge syıaqy - Tımýr Seıtenov, Qaırat Qudabaev, Bekzat Qulbabaǵa berildi.

Marapattaý keshinde otandyq estrada juldyzdary - Baýyrjan Isaev, Jeńis Ysqaqova, Súndet Baıǵojın, Almas Kishkenbaev, Dastan Orazbekov, Format toby óner kórsetti.  Sondaı-aq, kesh júrgizýshisi Nurlan Álimjan medıtsına qyzmetkerlerimen birigip, avtorlyq «Dáriger» ánin oryndady.

Eske salar bolsaq, jyl saıyn Qazaqstanda maýsym aıynyń úshinshi jeksenbisinde medıtsına qyzmetkerleri kúni atalyp ótedi. Aıtýly kún qarsańynda Astana qalasynyń ákimi Áset Isekeshev elordalyq dárigerlerge páter kiltin tabystady.

«Qalamyzda dárigerler men medıtsına qyzmetkerleri asqan jankeshtilikpen eńbek etip keledi. Jyl saıyn Astanaǵa 50-100 myń adam keledi jáne qalalyq emhanalarǵa aýyr júkteme túsedi. Kúndelikti elorda emhanalaryna 8,5 myń turǵyn keledi, 400-ge jýyq naýqas aýrýhanaǵa jatqyzylady, 120-ǵa jýyq aýyr orta jasalady, jedel járdem qyzmeti 1 500 shaqyrtýǵa qyzmet kórsetedi. Bul tsıfrlardyń artynda sizderdiń baǵa jetpes eńbekterińiz tur», - dedi Áset Isekeshev marapattaý rásiminde.