«Astananyń» uzaq úzilisteri maǵan unamaıdy - S.Stoılov
ASTANA. QazAqparat - Erteń, 21 qarasha kúni "Astana-Arena" stadıonynda "Astana" men "Qaırat" klýbtary arasynda fýtboldan Qazaqstan Respýblıkasy kýbogynyń fınaly ótedi. Búgin almatylyq "Qaırat" fýtbol klýbynyń bas jattyqtyrýshysy Vladımır Vaısstyń baspasóz máslıhatynan soń, «Astana» klýbynyń bas jattyqtyrýshysy Stanımır Stoılov ta erteńgi matchqa qatysty BAQ ókilderiniń suraqtaryna jaýap berdi.
S.Stoılov bir apta demalǵan komandasynyń mundaı «uzaq» úzilisteri ózine unamaıtynyn atap ótti.
«Maǵan komandanyń osyndaı uzaq úzilisteri unamaıdy. Sebebi, komandanyń oıyny men daıyndyǵy jaqsy jolǵa qoıyp alǵan edik. Endi, osyndaı úzilisterden keıin komanda qandaı formada ekenin bilý qıyn. Biraq, oıynshylarym Kýboktyń qandaı mańyzdy jarys ekenin túsinedi dep oılaımyn. Sondyqtan, alańdaǵy abyroıymyzdy qorǵaýymyz kerek», - deıdi S.Stoılov.
Stanımır Stoılov «Qaırat» komandasy óte myqty qarsylas ekenin, komanda bólinip emes, tutastaı oınaı biletinin, Qazaqstan chempıonatynyń fınalynda da osy komanda qarsylas bolǵanyn atap ótti.
«Komanda Qazaqstan chempıonatynyń fınalynda da bizge qarsy myqty oıyn kórsetti. Tipti, chempıonat fınalynyń sońǵy mınýttaryna deıin kimniń jeńetinin bilmedik. Erteńgi Kýbok fınalynda da osyndaı tartysty oıyn bolar», - dedi sózin aıaqtaǵan S.Stoılov. Bas jattyqtyrýshynyń baspasóz məslıhatynan keıin komanda oıynshylary "Astana-Arena" stadıonynda ashyq jattyǵý ótkizdi.
