Astananyń ýchaskelik ınspektorlary turǵyndardyń senimine kirý úshin belsendi jumys júrgizýde
ASTANA. Naýryzdyń 2-si. QazAqparat /Aıdar Ospanalıev/ - Elordalyq ýchaskelik ınspektorlar aqpannyń 19-ynan beri ózderine berilgen aımaqtardy 5 myń retten artyq aralaǵan.
Sondaı-aq qaladaǵy úılerdiń kireberisterinde 900-den astam aqparattar ilinip, arnaıy esepte turǵan 2 myńnan astam azamattarǵa tekserý júrgizgen. Bul málimetterdi búgin Astana qalalyq Іshki ister departamentiniń Til saıasaty jáne aqparat bóliminiń bastyǵy Nurdildá Oraz málim etti, dep habarlaıdy QazAqparat.
Onyń sózine qaraǵanda, bul Memleket basshysynyń turǵyndardyń ishki ister organdary qyzmetkerlerine degen senimin arttyrý qajettigi jónindegi bergen mindetin júzege asyrý maqsatynda atqarylýda. Sharanyń basty maqsaty ýchaskelik ınspektorlar men polıtsııa qyzmetkerleriniń mártebesin kóterý bolyp otyr. Aqpannyń 19-ynan bastalǵan is-shara barysynda tártip saqshylary qylmys pen quqyqbuzý áreketteriniń aldyn alý jumystaryn da júrgizýde. Ýchaskelik ınspektorlar turǵyndarmen pikir almasyp, olarǵa ózderi jónindegi málimetter jazylǵan qaǵazdaryn taratýda. Sondaı-aq shara barysynda qaladaǵy turǵyn úılerdiń kireberisterine ýaskelik polıtsııa qyzmetkerleriniń baılanys telefondary jazyp qaldyrylady. Tártip saqshylar atalǵandarmen qosa ishki ister organdarynda arnaıy eesepte turǵan azamattardy da udaıy tekserý ústinde. Atalmysh shara sáýirdiń 1-ine deıin jalǵasady dep kútilýde.
