Astananyń Ýálıxanov pen Seıfýllın kóshelerinde «Bus Lane»-dy engizý josparlanǵan
ASTANA. QazAqparat - Astana qalasynyń ákimdigi Sáken Seıfýllın jáne Shoqan Ýálıxanov kóshelerinde «Bus Lane»-dy belgili bir ýaqytta engizýdi usynyp otyr. Bul degenimiz, keptelis jıi bolatyn tańǵy jáne keshki ýaqytta atalǵan jolaqpen tek qoǵamdyq kólikter ǵana júre alady, dep xabarlaıdy QazAqparat tilshisi.
«Seıfýllın men Ýálıxanov - kólik keptelisi jıi bolatyn jerler. Biz úshin ol - úlken problema. Qysta kólik qozǵalysy baıaýlaıdy. Demek, atalǵan kóshelerde keptelister kóbeıe túsedi. Qazir Seıfýllınmen 25 marshrýt, al Ýálıxanovpen 25 marshrýt júredi. Ol jerden eń kóp 280 myń adam tasymaldanady. Oǵan qosa, eki kóshemen 70 myń kólik júredi», - dedi qalalyq jolaýshylar kóligi basqarmasynyń basshysy Bekmyrza Egemberdıev búgin qalalyq kólik keshenin damytý máselerine arnalǵan partııalyq tyńdaýda.
Onyń aıtýynsha, qazirgi kezde Sáken Seıfýllın jáne Shoqan Ýálıxanov kóshelerinde «Bus Lane»-dy belgili bir ýaqytta engizý jospary bar. Máselen, tańǵy saǵat 7.00-10.00 men keshki saǵattarda 18.30-20.00 aralyǵynda arnaıy jolaqpen tek qoǵamdyq kólikter ǵana júrse, avtobýstardyń jyldamdyǵyn arttyryp qana qoımaı, qozǵalys jıiligin de retteýge bolady.
«Dál osy máseleni biz sarapshylardyń talqylaýyna, jalpy xalyqtyń talqysyna shyǵaryp otyrmyz. Shyny kerek, atalǵan bastamany iske asyrsaq, Respýblıka sııaqty kórshi kóshelerge salmaq túsedi. Degenmen, keptelister jıi bolatyn kóshelerdiń qozǵalysyn retke keltire alamyz. Osyǵan baılanysty qoǵamnyń naqty usynystaryn kútemiz», - dep atap kórsetti Egemberdıev.
Resmı málimetke sáıkes, búginde Astana boıynsha 23 kóshede avtobýs jolaǵy engizildi. Aldaǵy ýaqytta taǵy 15 kóshede "Bus Lane"-dy engizý josparlanǵan.
