Astananyń týrıstik sımvolyn kórsete alatyn adam tabylmaı jatyr
ASTANA. QazAqparat - Astananyń týrıstik sımvolyn kórsete alatyn eskız- ıdeıalardy anyqtaıtyn respýblıkalyq konkýrstyń qazylar alqasy qabyldanǵan ótinishterdiń bir de bireýi talapqa saı emes degen qorytyndyǵa keldi.
Sondyqtan, birinshi konkýrs kúshin joıyp, konkýrstyń ekinshi kezeńi bastaldy, dep habarlaıdy QazAqparat.
Jalpy, konkýrsqa ótinish 25 qańtarǵa deıin qabyldanǵan bolatyn. Qazaqstannyń túpkir-túpkirinen 142 adam ótinish bildirgen eken. 26 qańtar kúni konkýrstyń qazylar alqasy konvertterdi ashyp, 13 úzdik jumysty tańdap alǵan. Alaıda, keıinirek, jumystardy baǵalap, ashyq daýys júrgizginnen keıin olar sol 13 jumysty da jaramsyz dep tapqan.
«Komıssııa jeti ret otyrys ótkizdi. Komıssııa músheleriniń arasynda sáýletshiler men dızaınerler, tarıhshylar bar. Komıssııa ótinishterdi birneshe ret qarap shyqty. Birneshe ret bas qossa da komıssııa ortaq bir sheshimge kele almady. Sondyqtan, konkýrstyń birinshi kezeńi joıyldy. Osylaısha, ekinshi kezeńin jarııalaý týraly sheshimge keldik»,-deıdi Astana qalalyq ishki saıasat basqarmasynyń basshysy Erlan Qanalımov.
Búginnen bastap, qazaqstandyqtar endi 20 kún ishinde osy konkýrsqa qatysa alady. Konkýrstyń júlde qory 3,5 mln teńge. Jeńimpaz adamǵa 2 mln, ekinshi oryn alǵanǵa 1 mln, úshinshi oryn alǵanǵa 500 myń teńge syıaqy beriledi.
