Astananyń turaqtandyrý qoryna 5 000 tonnadan astam ónim satyp alyndy
ASTANA. QazAqparat - Astana qalasyn azyq-túlikpen qamtamasyz etýdi jáne áleýmettik mańyzdy taýarlar baǵasyn ustap turýdy maqsat etken turaqtandyrý qoryn qalyptastyrý, saqtaý jáne paıdalaný aıasynda jalpy kólemi 5 262 tonnany quraıtyn ónim satyp alyndy, dep habarlady astana.gov.kz.
2014-2015 jyldarǵa arnalǵan azyq-túlik taýarlarynyń 10 túri bekitildi. Sonyń ishinde, kartop, sábiz, qyzylsha, pııaz, qyryqqabat, kúrish, qaraqumyq, qant, un, kúnbaǵys maıy bar. Atalǵan taýarlardyń barlyǵy saýda oryndaryna jiberilmes buryn «ASTANA» ÁKK» UK» AQ-nyń eki kókónis qoımasynda saqtalady.
Búgin qala basshysynyń orynbasary Ersaıyn Naǵaspaev jetekshilik etken Astana qalasy azyq-túlik taýarlarynyń turaqtandyrý qoryn basqarý jónindegi komıssııa kókónis qoımalarynyń jumysyn jáne olardyń qysqy ýaqytta elordany qamtamasyz etýge daıyndyǵyn tekserdi. «Qazirgi kezde elordada azyq-túlik taýarlaryn saqtaý boıynsha tapshylyq oryn alyp otyr. Sondyqtan ony joıý úshin jalpy alǵanda qosymsha 20-25-ke jýyq jańa kókónis qoımasyn salý kózdelgen. Búgin alynǵan azyq-túlik kólemi 2,5 aıǵa jýyq ýaqytqa jetedi. Bul baǵa qymbattaǵan jaǵdaıda ony ustap turýǵa yqpal etýge múmkindik beredi», - dedi «ASTANA» ÁKK» UK» AQ tóraǵasy Qaırat Jańabergenov. «ASTANA» ÁKK» UK» AQ eki kókónis qoımasy 5 000 jáne 8 000 myń tonna taýarǵa arnalǵan. Olardyń árqaısysy azyq-túlik taýarlaryn qabyldaý jáne saqtaý boıynsha zamanaýı qondyrǵylarmen jabdyqtalǵan. Bul ónimderdi 9 aıǵa deıin saqtaýǵa jol beredi. Buryn habarlanǵandaı, qalada 7 kókónis qoımasy jańadan salynyp jatyr, onyń úsheýi jyl sońyna deıin tapsyrylady. Bul 14,5 tonnaǵa jýyq ónim qajettiligin qanaǵattandyrady. Turaqtandyrý qorynyń azyq-túlikteri Astana qalasynyń saýda jelileri (40-tan astam saýda orny) men jeke saýda jelisi (qalanyń túrli aýdandarynda 22-den astam dúken) arqyly satylady.
