Astananyń túngi soty 4 myńǵa jýyq isti qarady
NUR-SULTAN. QazAqparat - Elordanyń mamandandyrylǵan aýdanaralyq ákimshilik soty «Túngi sot» jobasy aıasynda 4 myńǵa jýyq ákimshilik isti qarady, dep habarlaıdy QazAqparat.
Qalalyq sottyń baspasóz qyzmetiniń málimetinshe, «Túngi sot» jobasy ótken jyldyń maýsym aıynan beri jumys istep keledi. Oenda qaralǵan isterdiń basym kópshiligi júrgizýshilerdiń adamnyń densaýlyǵyna zııan keltirýge, kólik quraldarynyń nemese ózge de múliktiń zaqymdanýyna ákep soqqan jol qozǵalysy erejelerin buzýyna baılanysty.
«Túngi sot» 2018 jyldyń qazan aıynyń ortasynan beri otbasylyq-turmystyq quqyqtyq qatynastar men kóshi-qon zańnamasy salasyndaǵy isterdi qaraı bastady. Taraptar turmystyq daýlar boıynsha ádette ózara tatýlasady.
«Túngi sottaǵy» materıaldar keshki saǵat 18.30-dan bastap 22 saǵatqa deıin jedeldetilgen tártippen qaralady. Bul óz kezeginde ózderine hattama jasalǵan shetel azamattaryna keshikpeı ári basy artyq shyǵyn shyǵarmaı elden tez ketip qalýlaryna múmkindik beredi.
«Pikirlerge jasalǵan taldaý adamdardyń ózderiniń saqtandyrý tólemderine qatysty máselelerdi jedel sheshýge rızalyqtaryn bildiretindigin kórsetti. Óıtkeni olar sot qaýlysy zańdy kúshine engennen keıin úsh-bes táýlik aralyǵynda saqtandyrý somalaryn ala alady. Munyń ózi azamattarǵa materıaldyq zalaldy óteý boıynsha áserli kómek bolyp tabylady», delingen habarlamada.
