Astananyń «túngi sottary» qalaı jumys isteýi múmkin
ASTANA. QazAqparat - Astana qalalyq sotynyń baspasóz hatshysy Botagóz Baıan «túngi sottar» jobasy engizilgen jaǵdaıda, qalaı jumys isteıtinderi týraly aıtyp berdi, dep habarlaıdy QazAqparat tilshisi.
Quqyq buzýshy óziniń aıypty ekenin moıyndap, keltirgen zalal kólemimen kelisse, qos taraptyń da isti tezirek sotta qaraý týraly ótinishi bolsa, «Túngi sot» pılottyq jobasy engizilýi múmkin. Sonymen birge, sýdıa isti zardap shegýshiniń kelisiminsiz «túngi sotta» qaraı almaıdy. Іsti qaraǵanda prokýrordyń qatysýy mindetti. Quqyq buzýshyǵa da bilikti advokat pen aýdarmashy berilýi tıis», - dep jazdy ol sot pen quqyq qorǵaý organdarynyń jınalysynan keıin Facebook paraqshasyna.
Onyń aıtýynsha, atalǵan sharttar saqtalmaǵan jaǵdaıda, is boıynsha sot óndirisi jalpy tártipte júrgiziledi.
«Bul jobany engizý úshin jol kólik oqıǵasy, jol tártibin buzý, turmystyq-otbasylyq kıkiljińder, usaq buzaqylyq, mıgratsııa máseleleri boıynsha ákimshilik quqyq buzýshylyq isterin qarap shyǵý usynylady», - dep atap ótti Botagóz Baıan.
«Túngi sottardy» engizý qajettiligi jolda júrý erejelerin buzǵandardyń kóbeıýine qatysty týyndaǵan.
«Túngi sottardy» qurý tájirıbesi Sıngapýr, AQSh jáne ózge de elderdiń sot júıesinde bar. «Túngi sot» ákimshilik quqyq buzýshylyq týraly hattama toltyrylǵan sátten bastap, tez arada bul isti sotta qaraýǵa múmkindik beredi.
