Astananyń týǵan kúninde «Shyǵys bazary» esigin aıqara ashady
ASTANA. 12 maýsym. QazAqparat - Astananyń 14 jyldyǵyn merekeleý kezinde elordada jumbaq shyǵystyń aýanyn ákeler «Shyǵys bazary» esigin aıqara ashady, dep habarlaıdy astanaday.kz saıty.
Jármeńke 7-8 shilde kúnderi «Shapaǵat» kommýnaldy bazary men «Álem» saýda úıi jáne Abylaı han dańǵyly men Esil HQKO aýmaǵynda ótedi. Oǵan Astana qalasy men Aqmola oblysynyń kásipkerleri óz ónimderin qoıady.
«Taýaryn tez ótkizýge tyrysqan pysyq saýdagerlerdiń aıqaılaǵan daýsy, túrli-tústi taýarlar, dámdi taǵamdardyń ısi - kez-kelgen tutynýshyny úlken áserge bólemek», - dep jazady saıt.
Bazardyń basty urany: «Tutynýshyǵa bir taban jaqynyraq!» dep atalady. Qalanyń úsh núktesinde taýaróndirýshiler baǵasymen aýylsharýashylyǵy ónimderi qoıylady. Tutynýshylar shyǵys bazaryna naqty zat alý úshin nemese qydyryp kelse de olarǵa shyǵys bazary erekshe kóńil-kúı syılamaq.
«Dástúrli shyǵys bazarlary tek saýdanyń qyzǵan ortasy ǵana emes, turǵylyqty adamdardan eldiń tynys-tirshiligi týraly sońǵy habarlardy estıtin «aqparat aınasy» bolǵany jasyryn emes. Ondaı jerde saýdanyń narqy pen parqyn biletinderdiń upaıy túgel. Shyǵys bazaryna tap bolǵan jıhankezder, jolaýshylar ondaǵy qaınaǵan ómir jaıly aıtsa, danagóı qarııalar alys elderdegi ǵajaıyptar men qupııalar týraly syr shertedi. Bazar narqyn biletinder ámanda satyp alýshynyń da babyn taba biledi», - delingen habarlamada.
