Astananyń Trıatlon saıabaǵyndaǵy jaǵajaıda balyq qyryldy

NUR-SULTAN. QazAqparat – Nur-Sultan qalasynyń Trıatlon saıabaǵyndaǵy ózen jaǵasynda balyq qyryldy. Ol týraly qala turǵyny málim etip, ákimdik bolǵan jaıtqa qatysty túsinik berdi, dep habarlaıdy QazAqparat tilshisi.

«Ýyldyryq shashý kezeńine baılanysty ózendegi balyq sany edáýir ósti. Sol sebepten ózen jaǵajaıy aýmaǵyndaǵy torly qorshaýlarǵa balyqtar qystyrylyp qaldy. Qazirgi ýaqytta Trıatlon saıabaǵynda qaıta jóndeý júrgizilip, balyqtardyń kedergisiz qozǵalysyn qamtamasyz etý úshin basqa tor qoıyldy», - delingen elordanyń Almaty aýdany ákimdigi bergen jaýapta.

Aıta ketsek, astana turǵyny áleýmettik jelide Trıatlon saıabaǵyndaǵy tormen qorshalǵan ashyq jaǵajaıda balyqtardyń qyrylyp jatqany týraly jazǵan edi .

Eske sala keteıik, qala ákimdigi buǵan deıin botanıkalyq baqta qyrylǵan balyqqa qatysty jaǵdaıdy túsindirdi .

Qala turǵyndary balyqtyń jappaı qyrylýyna baılanysty jergilikti bıliktiń shara qoldanýyn talap etti.