Astananyń topyraǵy Reseıdiń Volgograd qalasyna jóneltildi
ASTANA. QazAqparat - 16-sáýir kúni B. Momyshuly eskertkishi alańynda týǵan jerdiń topyraǵyn Volgograd qalasyna jóneltý rásimi boldy. Bul shara Ekinshi dúnıejúzilik soǵystaǵy eń iri - Stalıngrad shaıqasyndaǵy jeńistiń 75 jyldyǵyna oraı uıymdastyryldy, dep habarlaıdy QR ІІM Baspasóz qyzmeti.
Osy shaıqasqa Aqmola aýmaǵynda qurylǵan qazaqstandyq 459 jáne 387-shi atqyshtar dıvızııasy qatysyp, Stalıngrad qalasyn erlikpen qorǵaǵany tarıhtan belgili.
Týǵan jerdiń topyraǵy arnaıy salynǵan kapsýlany jóneltý rásimine Astana qalasynyń ІІD-niń qyzmetkerleri, Uly Otan soǵysynyń ardagerleri men olardyń týysqandary, jaýynger-ınternatsıonalıster, Іshki ister organdary men Ulttyq ulan ardagerleriniń qazaqstandyq uıymy, Astana qalasynyń ákimdigi, «Nur Otan» partııasy «Jas Otan» jastar qanatynyń ókilderi qatysty.
ІІO jáne UU ardagerleri qazaqstandyq keńesiniń tóraǵasy Ómirzaq Bolsambekov saltanatty sharada Otandy jaýdan qorǵaý úshin Aqmola jerinen maıdanǵa kóp adam attanǵanyn áńgimelep, olardyń erlik isterine toqtaldy.
Taıaýda «Generaldar keńesi» respýblıkalyq qoǵamdyq birlestigi 27 sáýirde Reseıde Stalıngrad qorǵaýshylary - Qazaqstannan barǵan jaýyngerlerge arnalǵan granıtten jasalǵan eskertkishtiń ashylý saltanatyna shaqyrý alǵan bolatyn. 
«Generaldar keńesi» RQB delegatsııasy týǵan jerdiń topyraǵyn Reseı Federatsııasynyń Volgograd qalasyndaǵy «Mamaev qorǵany» memorıalyna ornatylǵan atalǵan eskertkishke qoıýdy josparlap otyr.
Osyndaı is-sharalar Stalıngradty qorǵaý úshin áskerı bólimder jasaqtalǵan birqatar oblystarda ótkizildi.
«Ata-babalarymyzdyń baǵa jetpes erligi men patrıottyq sezimderi bizdiń boıymyzda, biz Uly Jeńis jaýyngerleriniń biregeı erligi týraly estelikti jadymyzda saqtaımyz» dep atap ótti Іshki ister organdary men Ulttyq ulan ardagerleriniń qazaqstandyq keńesiniń tóraǵasy Ómirzaq Bolsambekov.
