Astananyń temirjol vokzalynda jolaýshylar AITV ınfektsııasyna tekserildi
ASTANA. QazAqparat - Astana qalalyq JITS-ke qarsy kúres ortalyǵy elordanyń temirjol vokzalynda jolaýshylardy AITV-ǵa qarsy jedel test synamasynan ótkizdi, dep habarlaıdy QazAqparat.
«BUU-nyń AITV/JITS boıynsha birlesken baǵdarlamasy aıasynda 2017 jylǵy 10 qarasha men 10 jeltoqsan aralyǵynda Dúnıejúzilik JITS-ke qarsy kúres aılyǵy jarııalandy. Dúnıejúzilik naýqan bıyl «Densaýlyqqa quqyǵyń bar» uranymen ótýde. Bul sharany elordanyń densaýlyq saqtaý salasy da qoldap, bir aı boıyna qala turǵyndarymen túsindirme-aqparattyq jumystaryn júrgizetin bolady. Sondaı-aq halyqtyń kóptep shoǵyrlanǵan jerlerinde jedel testiler uıymdastyrý josparlanýda. Aýqymdy is-sharalardyń alǵashqysy Astanadaǵy temirjol vokzalynda uıymdastyryldy», - delingen atalǵan ortalyq taratqan aqparatta.
Shara barysynda qala turǵyndary ǵana emes, elimizdiń ár óńirine sapar shekken kez kelgen jolaýshy SPID týrasynda mamandardan aqyl-keńes alyp, óz qalaýlarymen jedel test synamasyn tapsyrdy. Shamamen 400-ge jýyq adam sharaǵa qatysyp, onyń 200-ge jýyǵy test synamasynan ótti.
Astana qalalyq JITS-ke qarsy kúres ortalyǵy uıymdastyrý-ádistemelik bóliminiń meńgerýshisi Janna Aıtmaǵanbetqyzynyń aıtýynsha, sońǵy jyldary AITV juqpasyn juqtyrýshylardyń deni jastar bolyp otyr. Sondyqtan bul sharaǵa qatysýshylardyń arasynda jastardyń belsendilik tanytýy mamandardy qýantqan.
«JITS-ke qarsy kúres naýqanynda AITV-men ómir súretin adamdardyń quqyǵyna, densaýlyǵyna, medıtsınalyq qyzmetterdiń qoljetimdiligin ulǵaıtýǵa kóbirek kóńil bólinýde. Sondyqtanda biz ortalyq sheńberinde ǵana emes, osylaı turǵyndardyń arasyna jıi shyǵýdy maqsat etýdemiz», - deıdi ol.
Jedel testiden ótkenderdiń qatarynda kórshi elderdiń azamattary da boldy. Solardyń biri Qyrǵyzstan azamatshasy Ásııa Jumaǵalıeva: «Jańa sizderdiń aqparat taqtaıshalaryńyzdaǵy «SPID» degen jazýdy kórgende ózimdi bir úreı bıledi. Ózim de, jaqyndarymnan da bul juqpany juqtyrǵandar joq. Dese de, saqtanǵandy saqtaıdy ǵoı. Shyny kerek búginge deıin ár jerden atyn estigenim bolmasa onyń juǵý joldaryn bile bermeıdi ekenmin. Búgin, mine, kútpegen jerden jedel testten óttim jáne dárńgerlerdiń keńesin tyńdadym.Onsyz da ýaqyttary ótpeı, kólikterin kútip otyrǵan jolaýshylar úshin tıimdi boldy dep oılaımyn. Men saýda-sattyqpen ary-beri kóp júrip turamyn. Biraq mundaı sharany birinshi ret kórip otyrmyn. Uıymdastyrýshylarǵa rahmet», - dedi.
