Astananyń taǵy tórt kóshesinde birjaqty qozǵalys engizilmek
ASTANA. QazAqparat - Astananyń taǵy tórt kóshesinde birjaqty qozǵalys engizilmek. Qalalyq jolaýshylar kóligi basqarmasynyń basshysy Bekmyrza Egemberdıevtiń aıtýynsha, atalǵan bastama aldymen xalyqtyń talqysyna salynady, dep xabarlaıdy QazAqparat tilshisi.
"Buǵan deıin birneshe kóshede birjaqty qozǵalys engizildi. Endigi kezekte - Shákárim Qudaıberdi men Abylaıxan dańǵyldary. Sondaı-aq, Dinmuxammed Qonaev pen Dostyq kóshelerimen týra sondaı qozǵalysty engizýdi qarastyryp jatyrmyz. Ony da xalyqtyń talqysyna shyǵaryp otyrmyz. Qoǵamnyń qoldaýy bolsa, atalǵan sharalardy iske asyrýǵa daıynbyz", - dedi Egemberdıev búgin qalalyq kólik keshenin damytý máselerine arnalǵan partııalyq tyńdaýda.
Aıta keteıik, otyrys barysynda basqarma basshysy kólik keptelisteri jıi bolatyn Sáken Seıfýllın men Shoqan Ýálıxanov kóshelerinde "Bus Lane" jolaqtaryn belgili bir ýaqytta engizýdi de usyndy.
Budan bólek, qala ákimdigi xalyqtyń talqysyna taǵy bir úlken bastamany shyǵaryp otyr. Oǵan sáıkes, qoǵamdyq kóliktiń alymy kommýnaldyq tólem retinde keled i. Qala turǵyndary sony tólep, avtobýspen tegin júre alady. "Endi, ol salyq emes, qoǵamdyq kólikti damytý úshin alynatyn kommýnaldyq tólem tárizdi. Mysaly, qazir bir otbasy 30-40 myń teńgege jol júrý abonementin ("proezdnoı" - avt.) satyp alsa, jańa júıe boıynsha úsh-aq myń teńge tóleıtin bolady. Jeke kólikpen júretin biz de úsh myńnan tóleımiz. Sonda bárimiz qoǵamdyq kólik salasyn damytýǵa aqsha quıǵandaı bolamyz. Árıne, bul máseleni áli de talqylaý qajet. Halyqtyń pikirin bilgen jón", - deıdi qala ákimi Áset Isekeshev.
