Astananyń statsıonarlary men emhanalary óz múmkindikteriniń sheginde jumys isteýde

Bul týraly búgin «Nur Otan» partııasynyń Astana fılıalynda ótken sybaılas jemqorlyqpen kúres jónindegi qoǵamdyq keńes pen partııalyq baqylaý komıssııasynyń otyrysynda elordalyq densaýlyq saqtaý basqarmasynyń bastyǵy Dáýlethan Esimov málim etti.

Qańtardyń 1-inen bastap Qazaqstanda Densaýlyq saqtaýdyń biryńǵaı ulttyq júıesi jumys isteı bastaǵany barshaǵa aıan. Bul júıeniń negizgi maqsaty - halyqqa kórsetiletin medıtsınalyq qyzmettiń sapasyn arttyrý, medıtsınalyq qyzmetkerlerdiń kásibı ósýin yntalandyrý bolyp tabylady.

Dáýlethan Esimovtiń aıtýynsha, Densaýlyq saqtaýdyń biryńǵaı ulttyq júıesi Astanada sátti júzege asyrylýda. Biraq ta, bul bastama elordalyq medıtsınalyq mekemelerdiń óz múmkindikteriniń sheginde jumys isteýlerine ákelip otyr.

«Astanaǵa munshalyqty kóp naýqastar aǵylady dep kim oılaǵan. Biraq, is júzindegi jaǵdaı solaı. Adamdar alystan kelip, bizdiń emhanalarymyzda qala turǵyny retinde tirkelýde jáne bizdiń statsıonarlarymyzda emdelýde», - deıdi departament basshysy.

«Osyǵan oraı, qyrkúıektiń 1-indegi jaǵdaı boıynsha biz naýqastardy qabyldaýdyń jyldyq shekti kólemin tolyq oryndap bittik. Jáne bizge azamattardy emdeýge taǵy qosymsha shekti kólem qajet bolyp otyr. Biz Densaýlyq saqtaý mınıstrligine ótinish jasadyq, biraq ázirge bizge 10 myń shekti kólem ǵana berildi. Munyń ózi jetkiliksiz. Jyldyń sońyna deıin biz shamamen taǵy osyndaı shekti kólemge qyzmet kórsetýimiz kerek»,- dep túsindirdi D.Esimov.

Departament basshysy óz sózinde atap kórsetkendeı, «qaladaǵy statsıonarlar men emhanalar óz múmkindikteriniń sheginde jumys isteýde». Sondyqtan da, onyń pikirinshe, jańa emhanalar salý búgingi kúnniń tártibindegi ótkir máseleleriniń biri.