Astananyń sporttyq nysandar jelisi men saýyqtyrý demalys ınfraqurylymyn keńeıtýimiz qajet - Á. Jaqsybekov
Astana qalasynyń ákimi Ádilbek Jaqsybekov pen «Samuryq-Qazyna» AQ basqarma tóraǵasy Ómirzaq Shókeev qol qoıǵan memorandým ózara yntymaqtastyqty jetildirý, sonymen qatar Elbasynyń qoldaýymen 2012 jyldyń jeltoqsanynda qurylǵan «Astana» Prezıdenttik kásipqoı sport klýbyn damytý boıynsha birlese jumys isteýdiń basym baǵyttaryn belgileıdi.
"Elbasynyń salaýatty ómir saltyn qalyptastyrý, dene shynyqtyrý jáne kásipqoı sport salalaryna qatysty tapsyrmalaryn oryndaý - bizdiń ortaq mindetimiz. Ákimdik pen «Astana» sport klýbynyń birlesken áreketi negizinde biz dene shynyqtyrýmen júıeli túrde shuǵyldanatyndardyń sanyn arttyryp, elordanyń sporttyq nysandar jelisi men saýyqtyrý demalys ınfraqurylymyn keńeıtýimiz qajet. Ákimdik óz tarapynan dene shynyqtyrý jáne sportty damytý men nasıhattaý boıynsha klýbpen kez kelgen ýaqytta yntymaqtasýǵa daıyn", - dedi qala ákimi.
Ómirzaq Shókeevtiń aıtýy boıynsha, Astana qalasy ákimdigi men «Samuryq-Qazyna» AQ-nyń kásipqoı sportty damytý baǵytyndaǵy birlesken qoldaý sharalary bolashaqta qazaqstandyq sportshylardyń halyqaralyq saıystarda jarqyn jeńisterge jetýlerine septigin tıgizýi tıis.
Qazirgi ýaqytta «Astana» PKSK quramynda otandyq eń úzdik sport klýbtary - álemge áıgili kásipqoı velokomanda, basketbol jáne fýtbol klýbtary, «Barys» hokkeı klýby, Dakar joldaryn baǵyndyrǵan «Astana motorsports» komandasy, «Astana Arlans» boksshylary, at saıys pen sýdaǵy polo komandalary jáne ulttyq kúresti damytýǵa arnalǵan biregeı «Qazaqstan barysy» jobasy shoǵyrlanǵan.
Sonymen qatar, «Astana» brendimen aýyr atletıkadan eki dúrkin Olımpıada, tórt dúrkin Álem chempıony Ilıa Ilın jáne konkımen mánerlep syrǵanaýdan Olımpıada oıyndarynyń qola júldegeri, 2015 jylǵy tórt qurlyqtyń chempıony Denıs Ten esimderi dúnıe júzine tanylyp júr.
