Astananyń sol jaǵalaýynda 65 aıaldama salynady
ASTANA. QazAqparat - «Esil» aýdanynyń ákimi Ermaǵanbet Bólekpaevpen kezdesý barysynda aýdan halqy qoǵamdyq kólik pen aıaldamalardyń jetispeýshiligin aıtty, dep habarlaıdy elorda ákimdiginiń resmı saıty.
Trıýmfaldy qaqpa jaqta turatyn bir turǵyn áıel jańa aıaldama ornatyp, mektep oqýshylarynyń oqý ornyna jáne sport keshenderine alańsyz qatynaýyn sheship berýin ótindi.
Ermaǵanbet Bólekpaev bul máseleniń ózekti ekenin alǵa tarta kele, osy jyly 65 aıaldama keshenin ornatýdy josparlap otyrǵandaryn habarlady.
Ákimniń málimetinshe, ótken jyly 84 jańa avtobýs paıdalanýǵa bosatylǵan, aldaǵy ýaqytta taǵy da 170 qoǵamdyq kólik bosatý josparlanýda. Turǵyndardyń birneshe márte shaǵymdanýyna baılanysty № 47, 54, 100, 107, 301 jańa marshrýttar qosyldy. № 12 baǵdardyń júrisine ózgerister engizildi. «Esil» aýdanynda 270 aıaldama bar, qosymsha 65 ornatylmaq.
Esterińizge sala keteıik, «Esil» aýdanynyń ákimi Ermaǵanbet Bólekpaevtyń halyqpen kezdesýi 19 qańtar kúni bastaldy jáne 27 qańtarǵa deıin jalǵaspaq. Osy ýaqyt aralyǵynda 8 kezdesý bolady, onda aýdan basshysy densaýlyq saqtaý mekemeleriniń medıtsına qyzmetkerlerimen, turǵyn úı alaptaryn qosa alǵanda aýdan halqymen kezdesedi.
