Astananyń shetkeri aýdandaryna 65 shaqyrym jol men 136 shaqyrym ınjenerlik jeli salyndy
ASTANA. QazAqparat - Astananyń shetkeri aýdandaryn damytý qolǵa alynýda. Osy maqsatta 2010 jyldan bastap Astana qalasynyń shetkeri aýdandaryn damytý tujyrymdamasy júzege asyryla bastady. Qujat boıynsha joldar men ınjenerlik jelilerdi salý, sonymen qatar turǵyn úı alabtarynda adamdarǵa qolaıly jaǵdaı jasaýdy keshendi túrde iske asyrý qarastyrylǵan.
«Elordanyń turǵyn alabtarynda ınjenerlik jelilerdi qalpyna keltirý jáne jóndeý, joldar salý jumystary qolǵa alyndy. Jalpy, 150 myńǵa jýyq adam turatyn 20 turǵyn alabyn qamtý kózdelgen. Búgingi tańda 232 shaqyrym jol salyndy. 2011-2013 jj. 15 turǵyn alabynda tıisti jumystar qarqyndy júrgizilip, 65,3 shaqyrym jol men 136 shaqyrym ınjenerlik jeli jańadan salyndy. 5 turǵyn alabynda jumystar tolyǵymen aıaqtaldy», - dedi Astana qalasynyń Jolaýshylar kóligi jáne avtomobıl joldary basqarmasynyń basshysy Rashıd Amanjolov qalalyq máslıhatta. Qazir kommýnaldyq sharýashylyq basqarmasy Ońtústik-Shyǵys shaǵynaýdanyn abattandyryp jatyr. «2011 jyldan beri Ońtústik-Shyǵys shaǵynaýdanynyń oń jaǵyn abattandyrý jobasy júzege asyrylýda. Jumystardyń basym bóligi aıaqtaldy. Qazirgi kezde 600-den astam úı tolyǵymen ınjenerlik jelilermen qamtamasyz etildi», - dedi Astana qalasynyń kommýnaldyq sharýashylyq basqarmasynyń basshysy Pavel Kýlagın. Aıta keteıik, turǵyn alabtaryn ortalyqtandyrylǵan jylytý júıesine qosý Astana qalasynyń shetkeri aýdandaryn damytýda mańyzdy. Bul JEO-3 iske qosylǵannan keıin múmkin bolmaq. Jylý ortalyǵynyń birinshi kezegin 2016-2017 jj. jylytý maýsymynda tapsyrý josparlanǵan, dep habarlanǵan elorda ákimdiginiń resmı saıtynda.
