Astananyń shekarasy ózgermeıdi – Bas jospar

ASTANA. QazAqparat – Astana qalasynyń Sáýlet, qala qurylysy jáne jer qatynastary basqarmasy basshysynyń orynbasary Aıan Smaǵulov QazAqparat saýalyna joldaǵan jaýabynda elordanyń shekarasy qazirgi qalpynan ózgermeıtinin, keleshekte osy shekara aıasynda damytylatynyn málim etti.

«Qala shekarasynyń ózgerýine jáne jańa turǵyn aýdandardyń perspektıvaly qurylysyna qatysty ázirlenip jatqan Bas josparda Astana qalasynyń shekarasyn ózgertý kózdelmegen», - dep jazady Aıan Smaǵulov.

Onyń aıtýynsha, qazirgi tańda jańa qurylys aýmaqtaryn keshendi salý jumystary, qalanyń keıbir bóligin qaıta jańartý júrgizilip jatyr.

«Myńjyldyq» alleıasy jáne «Metro» saýda ortalyǵy aýdanyndaǵy Qaraǵandy trassasynyń ońtústigindegi aýmaq, Máńgilik el dańǵylyndaǵy qurylys, Turan dańǵylynyń batysyndaǵy qurylystar, Telman turǵyn alabynyń ońtústigindegi aýmaqty damytý jobasy, Asan Qaıǵy kóshesiniń boıyndaǵy aýmaqty qaıta jańartý jáne jańartý jumystary osy maqsatqa baǵyttalǵan», - delingen jaýapta.