Astananyń Saryarqa aýdanynda 800 oryndyq kásiptik mektep salynady
ASTANA. 4 aqpan. QazAqparat - Elordanyń Saryarqa aýdanynda 800 oryndyq kásiptik mektep salynady. Bul týraly Astana ákimdiginiń astana.kz saıtynan habarlandy.
Málimetterge qaraǵanda, búginde Astana qalasy Saryarqa aýdanynda kópfýnktsııaly turǵyn úı keshenin, kommertsııalyq nysandar men óndiristik bazalardy, áleýmettik mádenı-turmystyq jáne bilim berý nysandaryn qosa eseptegende 80 qurylys nysany bar. 2012 jyly Saryarqa aýdanynyń aýmaǵynda Áýezov kóshesi boıynda №6 mektep gımnazııasynyń qurylysy, Belıakov kóshesindegi 600 oryndyq №19 mekteptiń japsarlas bóligi, «Kóktal» turǵyn úı alabynyń ońtústik shyǵysyndaǵy (280 oryndyq) jáne Seıfýllın kóshesiniń ońtústigine qaraı ornalasqan (240 oryndyq) 2 balabaqsha qurylysy júrgizilgen. Ákimdik habarlamasyna qaraǵanda, atalǵan nysandar paıdalanýǵa aǵymdaǵy jyldyń kókteminde beriledi.
Sonymen qatar Saryarqa aýdanynda kásiptik-tehnıkalyq bilim berý mekemeleriniń ozyq jelisi damytylyp jatyr. «Qazirgi kezde elordanyń Bógenbaı batyr dańǵyly boıyndaǵy 800 oryndyq beıindi kásiptik mekteptiń, sondaı-aq, Qarasaı batyr kóshesi boıyndaǵy jalpy bilim beretin oqý ortalyǵynyń qurylystary júrgizilýde. Buǵan qosa, bıylǵy jyly energoqamtý jáne baılanys salasyna oqytýǵa beıindi 800 oryndyq taǵy bir kásiptik mekteptiń qurylysyn paıdalanýǵa berý josparlanǵan», - delingen habarlamada.
