Astananyń «saqaldy qurylystaryn» 6-8 aıda bitirý jospary bar - S. Horoshýn
ASTANA. QazAqparat - Astananyń «saqaldy qurylystaryn» 6-8 aıda bitirý josparlanýda. Bul týraly Astana ákiminiń birinshi orynbasary Sergeı Horoshýn jýrnalısterge arnalǵan baspasóz máslıhatynda aıtty.
«Qazirgi tańda qalada 20 shaqty saqaldy qurylys bar. Olar ótken jyldardaǵy daǵdarys kezinde turyp qalǵan nysandar. Degenmen, kóbinde jumystar bitken dep aıtýǵa bolady, biraq olardyń qurylysynda talaptar buzylǵan nemese olardy salǵan kompanııalardyń basshylary búginde qashyp júr. Ne bolmasa óz erkimen qurylysty bitirýden bas tartqan. Búginde olardyń jumysyn bitirýdi PIK-ter men Turǵyn úı-qurylys kooperatıvteri óz moıynyna aldy, biz olarǵa qoldaý kórsetýdemiz. Ár nysan boıynsha qolda bar josparmen saqaldy qurylystardy tolyq salyp shyǵýǵa áli 6-8 aı qajet bolady», - dep atap ótti ol.
Ákim orynbasarynyń aıtýynsha, «Azbýka jılıa» kompanııasyna qatysty ınvestorlar tarapynan túsken aryzdar boıynsha qylmystyq is qozǵaldy.
«Búgingi tańda «Azbýke jılıa» boıynsha ınvestorlardyń aryzdary boıynsha qylmystyq is qozǵalǵan. Tergeý amaldary áli bitken joq, degenmen aldyn ala málimet boıynsha atalǵan kompanııanyń ár nysany boıynsha jeke-jeke komıssııalar qurylyp, olar ınvestorlardyń sany men kompanııanyń múlki boıynsha salystyrma jumystaryn júrgizýde. Osy jumystar aıaqtalysymen ár nysan boıynsha qurylysty aıaqtaý algorıtmi jasalady. Qazirgi tańda atalǵan nysandardy salyp bitirý jóninde ınvestorlar tarapynan kelip túsken aldyn ala usynystar bar», - deıdi S. Horoshýn.
