Astananyń resmı saıtynda memlekettik baǵdarlama boıynsha baspana alýǵa úmitkerlerdiń tizimi jarııalandy

Turǵyn úı komıssıasy 19 tamyzda Turǵyn úı qurylysynyń 2008-2010 jyldarǵa arnalǵan memlekettik baǵdarlamasynyń ekinshi kezeńine qatysýshylardyń qujattaryn bekitilgen talaptarǵa sáıkestigin tekserip boldy jáne olardyń baldaryn esepteýdi aıaqtady.

Barlyǵy turǵyn úı alýǵa jubaılardyń jasy 29-dan aspaıtyn, balalary bar jas otbasy, memlekettik organdar, bıýdjettik mekemeler men memlekettik kásiporyndardyń qyzmetkerleri sekildi basym sanattarǵa jatatyn 26448 ótinish bildirýshi úmitker bolyp otyr.

Komıssııanyń úndeýinde Memlekettik baǵdarlamany júzege asyrýdyń Erejelerine sáıkes, Memlekettik baǵdarlama boıynsha turǵyn úı alýǵa úmitkerlerge ball berý júıesi qoldanylǵany atap kórsetilgen. Mysaly, «memlekettik qyzmetshi», «memlekettik mekeme qyzmetkeri», «memlekettik kásiporyn qyzmetkeri» sanattary boıynsha qatysýshylarǵa baldar jumys ótiline sáıkes - 1 tolyq jylǵa 5 baldan, tolyq emes jylǵa 3 baldan qosylyp otyrdy. «Jas otbasy» sanaty boıynsha ár balaǵa 20 baldan esepteldi. Eger ótinish bildirýshi 2005-2007 jyldardaǵy Memlekettik baǵdarlamaǵa qatysqan bolsa, onyń baldaryna taǵy da 10 ball qosyldy.

«Turǵyn úı alý kezinde birinshi krıterıı boıynsha kóp ball jınaǵandar basymdyqqa ıe bolady. Birinshi krıterıı boıynsha baldary birdeı bolǵanda qosymsha baldar qosylǵan ótinish bildirýshiler basymdyqqa ıe bolady», - delingen turǵyn úı komıssııasynyń úndeýinde.

Aldyn-ala jarııalanǵan tizimge, jyljymaıtyn múliktiń bar ne joqtyǵy jóninde málimetterge qatysty suraqtar, berilgen baldar boıynsha kelispegen jaǵdaıda, shaǵymdar ústimizdegi jylǵy 16 qyrkúıekke deıin qabyldanady.