Astananyń polıtsııasy túngi klýbtardyń kúzetin esirtki paıdalanǵan adamdardy anyqtaý boıynsha daıyndyqtan ótkizýge bel býdy

«Feıs-baqylaýda turǵan sizderdiń kúzet qyzmetin tıisti daıyndyqtan ótkizýge daıynbyz. Biz olardy esirtki paıdalanǵan adamdy syrtqy kelbetinen, ıaǵnı bet ajary arqyly anyqtaýǵa úıreter edik. Narkologtardy jáne Salaýatty ómir saltyn qalyptastyrý ortalyǵynyń ókilderin shaqyramyz»,-dedi búgin elordalyq túngi klýbtardyń basshylarymen kezdesý barysynda Astananyń ІІD esirtki bıznesine qarsy kúres basqarmasynyń bastyǵy Vadım Altynbekov.

Sonymen qatar ol jańaǵy oıyn-saýyq oryndarynyń basshylary tarapynan olardyń qyzmetkerlerine qatysty kúdik týatyn bolsa, basqarma tarapynan tıisti tekserý júrgizýge kómektesýge daıyn ekenin jetkizdi.

Budan bólek V. Altynbekov jıyn barysynda kóńil kóteretin oryndarda esirtki zattarynyń taralýynyń jolyn kesý boıynsha memorandýmdy bekitýdi usyndy.

Osy oraıda ol elordadaǵy kóńil kóteretin oryndarda esirtki satý faktileri buǵan deıin kezdeskenin eskerip ótti.

Basqarma bastyǵynyń aıtýynsha, jyl basynan beri elordada esirtkige qatysty 250-den astam qylmys tirkeldi. Aınalymnan 350 kelige jýyq esirtki zattary tárkilendi. Sonymen qatar bıyl geroın saýdasynyń da úrdisiniń ósýi baıqalǵan eken. Máselen ótken jyly 3 kelige jýyq tárkilengen bolsa, bıylǵy jyly 7 kelige tarta geroın tárkilendi.