Astananyń polıtseıleri senimge kirý arqyly túngi klýb ıesiniń dúnıe-múlkin ıemdenbek bolǵan qylmystyq topty quryqtady

Bul týraly elordalyq ІІD-niń baspasóz qyzmetinen habarlady.

Habarlanǵandaı, Astanada ózderiniń aram pıǵyldaryn júzege asyrmaq bolǵan 3 adamnan quralǵan qylmystyq top Qaraǵandy qalasynyń turǵyndary bolyp shyqty.

Qylmystyq oqıǵanyń jelisi bylaı órbigen. Aǵymdaǵy jyldyń aqpan aıynda Astanaǵa ýaqytsha turýǵa kelgen, buryn birneshe ret sotty bolǵan 33 jastaǵy «A» esimdi azamat qalanyń túngi klýbtarynyń biriniń ıesimen tanysady, onymen jaqyn aralasyp, senimine kiredi. Keıin jábirlenýshiniń jeke múlkin jáne aqshasyn ıemdený maqsatynda ol Qaraǵandyǵa baryp, eki sybaılas taýyp alyp keledi. Olar buryn sottalǵan jáne negizgi aıyptalýshymen birge jazalaryn ótegen 35 jáne 26 jastaǵy azamattar. Aqpan aıynyń bir keshinde olar jábirlenýshi áıelge úıiniń kire-berisinde shabýyl jasap, kólikke kúshpen kirgizedi de, aldyn ala jalǵa alynǵan páterge alyp keledi. Soqqyǵa jyǵylǵan áıelden baǵaly zattaryn, uıaly telefonyn, altyn áshekeı buıymdaryn, qujattaryn tartyp alǵan soń, jeke menshigindegi múlikterden bas tartý týraly qujattardy notarıaldy túrde rásimdeýge májbúrlegen.

Balasy anasynyń úıdiń janyna tastap ketken kóligin kórip polıtsııaǵa habarlasqannan keıin, jedel-izdestirý sharalary júrgizildi. Onyń barysynda qylmyskerlerdiń páteri anyqtalyp, jábirlenýshi bosatyldy. Negizgi aıyptalýshy «A» qolǵa túsip, ekeýi jasyrynyp úlgeredi. 10 kúnniń ishinde Astana qalasynyń ІІD UQKB qyzmetkerleri qalǵan eki qylmyskerdi Qaraǵandy qalasynda ustady.

Qazir qylmyskerler elordada tergeý abaqtysynda otyr, olarǵa QR QK-niń 125-shi (adam urlaý), 179-shy (qaraqshylyq shabýyl) jáne 327-shi baptary (ozbyrlyq) boıynsha aıyp taǵyldy.