Astananyń orys drama teatry halyqaralyq festıvalda óner kórsetti
ASTANA. QazAqparat - M. Gorkıı atyndaǵy Memlekettik akademııalyq orys drama teatry Serbııada І «Synergy#wtf» halyqaralyq teatr festıvaline qatysty, dep habarlaıdy elorda ákimdiginiń medıa ortalyǵy.
Serbııalyq kórermenniń nazaryna otandastarymyz óz repertýaryndaǵy úzdik spektaklderdiń biri - «Mankýrt. Vechnyı rab» mısterııasyn usyndy.
Qyrǵyz jazýshysy Shyńǵys Aıtmatov romanynyń jelisimen qoıylǵan mısterııadaǵy rólderdi M.Gorkıı atyndaǵy orys drama teatrynyń akterlary somdady. Qoıýshy rejısseri - Barzý Abdýrazzakov. Qoıylym astanalyq teatr dırektory Erkin Qasenovtyń jetekshiligimen Ortalyq Azııa halyqtarynyń teatr óneriniń damý deńgeıin kórsetti.
Qoıylym barysynda serb jáne aǵylshyn tilderinde sýbtıtrler jazylǵandyqtan zalda otyrǵan kórermender úshin qoıylymnyń fılosofııasy túsinikti boldy.
Spektakl bastalmas buryn astanalyq teatr kelýshilerdiń nazaryna kórme uıymdastyrdy. Shara kezinde teatrdyń tarıhy týraly aıtylyp, Aqmola qalasynyń sırek kezdesetin alǵashqy sýretteri men qazirgi Astananyń kórinisteri kelýshilerdiń nazaryna usynyldy. Kórme barysynda jas Astana týraly ánder shyrqalyp, qazaq halqynyń kúıleri oınaldy.
Astana qalasynyń mádenıet, muraǵattar jáne qujattama basqarmasy «Mankýrt. Vechnyı rab» qoıylymy serbııalyq kórermenniń júregin jaýlap, festıvaldi uıymdastyrýshylar men kelýshilerdiń kóńilinen shyqty dep habarlady.
Serbııalyq tarap astanalyq teatrdyń festıvalge qatysýyna kóp kómek kórsetkenin aıta ketý kerek. Olar spektaklge qajetti dekoratsııalardy ázirlegen.
«Gorkıı atyndaǵy teatrdyń Serbııaǵa kelýin taǵatsyzdana kúttik. Baǵdarlamada usynylǵan spektakl festıvaldi uıymdastyrýshylardyń qyzyǵýshylyǵyn oıatty. Qazirgi zamanǵy teatr óz halqynyń ǵana emes, sonymen qatar álemdik dramatýrgııanyń da mádenı jetistikterin pash etedi. Al teatrlardyń damýy men yntymaqtastyǵy - bul memleketterdiń ózara yntymaqtastyǵynyń nátıjesi», - dedi «Synergy #wtf» festıvaliniń dırektory Valentıl Ventsel.
Aıta keteıik, festıval bir aptaǵa jalǵasty, oǵan Vengrııa, Rýmynııa, Makedonııa, Qazaqstan jáne Serbııa memleketterinen teatr ujymdary qatysty. Shara aıasynda ónerpazdar sımpozıýmdar ótkizip, tájirıbe almasyp, aldaǵy teatr maýsymyna arnalǵan josparlarymen bólisti.
