Astananyń ortalyq kóshesindegi valıýta aıyrbastaý bólimshesin tonamaq bolǵan kúdikti izdestirilýde
ASTANA. QazAqparat - Astananyń qaq ortasyndaǵy valıýta aıyrbastaý bólimshesine qaraqshylyq nıetpen shabýyl jasalǵan. Táýlik boıy úzdiksiz jumys isteıtin orynǵa qolyna pyshaq ustap kelgen jigit ony tonamaq bolǵan.
Oqys oqıǵa 26 mamyr kúni túngi saǵat 3 pen 4-tiń aralyǵynda oryn alǵan. Demalyssyz jumys isteıtin Respýblıka dańǵylynyń boıyndaǵy aıyrbastaý bólimshesine kelýshiler qarasy úzilmeıdi. Sony bilse kerek, artqy jaǵyndaǵy esikke bir jas jigit kelip, kúzetshini sózge tartady.
Esik ashyla sala, kúdikti kúzetshige pyshaǵyn sermep qalady. Ekeýi arpalysyp, shabýyldaýshy kúzetshiniń moınyn kesip túsedi. Sodan keıin beınebaqylaý kameralaryn baıqap qalǵan ol eshteńe almastan oqıǵa ornynan taıyp turǵan. Abyroı bolǵanda, kúzetshiniń jaraqaty aýyr bolmaı shyqty, dep habarlaıdy 31 arna.
Qazir polıtseıler kúdiktini izdestirip jatyr. Al qarjy mekemesiniń ókilderi bul tártip saqshylarynyń beıqamdyǵynan deıdi.
«Kenesary men Imanov kóshelerine deıin 8 valıýta aıyrbastaý pýnkti bar. Sony qarap jatqan eshkim joq. Buryn osy Respýblıka dańǵylynyń boıynda tártip saqshylary júretin», - deıdi valıýta aıyrbastaý bólimshesi dırektorynyń orynbasary Jomart Qurmashev.
